Eugen Cakolli nga KDI ka folur në lidhje me ngërçin institucional që ka përfshirë vendin tani e disa muaj.
Cakolli në reagimin e tij thekson se të dalësh i pari në zgjedhje s’do të thotë se i ke fitu zgjedhjet.
Ai tha se ‘nëse nuk fiton 61 mandate, partia e parë nuk ka fituar asgjë tjetër përveç të drejtës për të filluar negociatat me të tjerët’.
“Në demokraci, vota e deputetëve nuk imponohet. Ajo nuk detyrohet as përmes retorikës, as me etiketime, linçime apo presion publik ndaj atyre që mendojnë ndryshe. Tek e fundit, dështimi i një kandidature nuk lidhet me emra të përveçëm apo me biografi familjare – por me mungesën e mbështetjes së nevojshme.Pa vullnet për kompromis në një marrëveshje politike që siguron shumicën parlamentare, faji për bllokadën bie mbi ata që refuzojnë realitetin politik” shkruan Cakolli.
Reagimi i plotë:
Me dalë i pari në zgjedhje nuk do të thotë me i FITU zgjedhjet!
Në sisteme parlamentare, të dalësh i pari në garë është e rëndësishme – por e pamjaftueshme për të qeverisur i vetëm. Sepse, institucionet formohen vetëm kur ndërtohet shumica e nevojshme. E të qenit “partia e parë” nuk është e barasvlefshme me të drejtën absolute për të udhëhequr, sidomos në mungesë të kompromisit me të tjerët.Nëse nuk fiton 61 mandate, partia e parë nuk ka fituar asgjë tjetër përveç të drejtës për të filluar negociatat me të tjerët. Madje, në sistemin tonë, as fitimi i 50%+1 të votave nuk e garanton shumicën në Kuvend.
Në demokraci, vota e deputetëve nuk imponohet. Ajo nuk detyrohet as përmes retorikës, as me etiketime, linçime apo presion publik ndaj atyre që mendojnë ndryshe. Tek e fundit, dështimi i një kandidature nuk lidhet me emra të përveçëm apo me biografi familjare – por me mungesën e mbështetjes së nevojshme.Pa vullnet për kompromis në një marrëveshje politike që siguron shumicën parlamentare, faji për bllokadën bie mbi ata që refuzojnë realitetin politik.
