Eugen Cakolli nga IKD ka reaguar lidhur me situatën e krijuar rreth konstituimit të Kuvendit, duke thënë se përveç afatit 30-ditor, tashmë po shpërfillet edhe afati 48-orësh i përcaktuar për vazhdimin e procesit.
Cakolli ka thënë se shkeljet e afateve po normalizohen, nëse ato nuk kanë pasoja juridike.
“Përveçse u shkel afati 30-ditor, tashmë po shpërfillet edhe vetë kufiri 48-orësh, që fillimisht u përdor si mjet për ta shtyrë procesin pas afatit”, ka shkruar Cakolli.
Sipas tij, kjo situatë e bën edhe më urgjente dërgimin e çështjes në Gjykatën Kushtetuese, veçanërisht për shkak të afatit tetëditor për kontestimin e vendimit të Kuvendit.
Ai ka argumentuar se, pa një vendim të Kushtetueses, procesi i konstituimit të Kuvendit, formimit të Qeverisë dhe fillimit të afatit për zgjedhjen e Presidentit mbetet pezull.
“Argumenti se kjo do t’i blinte kohë LVV-së tashmë e ka humbur kuptimin, sepse koha po fitohet edhe pa Gjykatën, përmes mosveprimit”, ka deklaruar Cakolli.
Cakolli ka ngritur edhe çështjen e ushtrimit të funksioneve ekzekutive nga kryeministri, zëvendëskryeministrat dhe ministrat që janë certifikuar si deputetë.
Sipas tij, ushtrimi i njëkohshëm i këtyre funksioneve është i papajtueshëm me Kushtetutën dhe kjo, siç pretendon ai, është konfirmuar edhe nga Gjykata Supreme.
“Rrjedhimisht, edhe vendimet e tjera të nxjerra prej tyre pas certifikimit janë të kundërligjshme”, ka shkruar Cakolli.
Në fund, ai ka bërë thirrje që së paku dhjetë deputetë ta dërgojnë çështjen në Gjykatën Kushtetuese.
“Të paktën dhjetë deputetë duhet ta dërgojnë sa më parë çështjen në Gjykatën Kushtetuese”, ka shkruar Cakolli, duke kërkuar që Gjykata të përcaktojë pasojat juridike të skadimit të afatit 30-ditor, vlefshmërinë e veprimeve të ndërmarra pas tij dhe nëse duhet të hapet rruga për zgjedhje të reja.
