Çështja e shqiptarëve në Luginë të Preshevës po diskutohet në Konferencën e Ambasadorëve, në ditën e tretë të kësaj ngjarjeje.
Tema po trajtohet nga paneli me përfaqësuesit nga Lugina: Shaip Kamberi, Ardita Sinani dhe Enkel Rexhepi.
“Gjatë diskutimit po theksohen, sfidat dhe diskriminimi sistematik me të cilin përballen shqiptarët atje.
Po ashtu, po kërkohen hapa dhe veprime të koordinuara nga institucionet e Kosovës dhe partnerët ndërkombëtarë, me qëllim avancimin e të drejtave, mbrojtjen e identitetit dhe përmirësimin e kushteve të jetesës së shqiptarëve në Luginë”, thuhet në njoftimin e Ministrisë së Punëve të Jashtme dhe Diasporës.
Konferenca e Ambasadorëve, që sivjet mbahet për herë të tetë, mblodhi përfaqësues diplomatikë nga e gjithë bota, për të reflektuar mbi punën e bërë dhe rezultatet e punës diplomatike.
Në dy ditët që lëmë pas, në konferencë u diskutuan çështje relevante mbi diplomacinë, sigurinë dhe mbrojtjen.
