Ngritja e kapaciteteve dhe industrisë së mbrojtjes, rritja e ndërveprueshmërisë përmes edukimit, trajnimit dhe ushtrimeve, rritja e angazhimit për luftimin e kërcënimeve hibride dhe për forcimin e qëndrueshmërinë strategjike si dhe bashkërendimi i politikave për integrime euroatlantike, janë katër pikat e deklaratës për aleancë ushtarake mes Kosovës, Shqipërisë dhe Kroacisë.
Ministria e Mbrojtjes e Kosovës tha për RTV21 se kjo marrëveshje do të zbatohet në përputhje me kërkesat e ushtrive të tri vendeve si dhe interesave shtetërore.
“Deklarata trelaterale e nënshkruar ndërmjet Kosovës, Shqipërisë dhe Kroacisë, është e para e këtij lloji në këtë rajon, dhe është e një rëndësie të veçantë pasi përveçse i hap rrugë bashkëpunimit të ngushtë në fushën e mbrojtjes, rritë dhe sigurinë, pasi unifikimi në mbrojtje është mesazh për të gjithë ata që guxojnë të kërcënojnë paqen dhe stabilitetin në Ballkanin Perëndimor, por dhe sigurinë e vendeve nënshkruese të kësaj deklarate. Marrëveshja fillon së zbatuari menjëherë, sipas dhe në përputhje me kërkesat e Forcës së Sigurisë së Kosovës dhe ushtrive të vendeve përkatëse, si dhe interesave shtetërore bazuar në zhvillime strategjike”, thuhet në përgjigjen e Ministrisë së Mbrojtjes së Kosovës.
Nënshkrimi i deklaratës për bashkëpunim në fushën e mbrojtjes dhe sigurisë u bë një ditë më parë në Shqipëri nga ministrat e mbrojtjes, të Kosovës, Shqipërisë dhe Kroacisë duke u cilësuar si hap i rëndësishëm për forcimin e sigurisë dhe stabilitetit në rajon.
Ish-komandanti i FSK-së, Kadri Kastrati për RTV21 thotë se bazuar në situatën globale të sigurisë kjo marrëveshje është një fitore e madhe për Kosovën dhe e njëjta sipas tij do ta përafrojë vendin drejt anëtarësimit në NATO.
“Duke u bazuar në situatën globale te sigurisë…kjo marrëveshje trelaterale që unë e kam thënë ka disa muaj që do të ishte mirë u realizua është një marrëveshje historike sepse Kroacia dhe ka janë vëllezër në pushkë, kanë kërcënime dhe rreziqe nga i njëjti armik dhe këtu është bashkëngjitur edhe Shqipëria dhe ka jetësuar një aleancë në regjion. Kjo mund ta quajmë marrëveshje historikë sepse nëse diçka ndodh këto shtete do ta përkrahin njëra tjetrën ne historike ushtarake Kroacia është prodhuese e ramëve dhe makinerive ushtarake për Kosovën do të jetë një përkrahje jashtëzakonisht e i fuqishëm pasi që është afër kemi parterin kryesor strategjik ne rajon dhe kjo është fitore e madhe duhet ta shqyrtojnë institucionet. Kroaci dhe Shqipëria janë pjesë e NATO-s dhe kjo do jetë akoma një mbështetje më e fuqishme për Kosovën sa me shpejtë në rrugëtimin ne NATO.”, tha Kastrati.
Se kjo marrëveshjeje përveç tjerash e ndihmon Kosovën edhe në rrugëtimin e saj drejt NATO-s e thotë edhe ish-koloneli i FSK-së, Afrim Veseli i cili shtron nevojën për zbatim sa më të shpejtë të saj.
“Çdo marrëveshje që synon ta ngris operacionalitet e FAK-së për mbrojtjen e territorit është mjaft e dobishme mirë që është arrite…një aleancë ne kuptimin e ngritjes së industrisë kuptimin armëve është mjaft e dobishme në Ballkan populli i Ballkanit e ka vetëm një armik Serbinë, duhet një aleancë e tilla është mjaft e rëndësishme në këtë kohe që po kalon bota me ndryshimit e mëdha gjeostrategjike do të ishte mirë ishte mirë që ministria mbrojtjes të bëjë presion pozitiv që sa më shpejtë këto marrëveshje të jetësohen. Padyshim që e përafron ato janë vende të NATO-s”, tha Veseli.
Deklarata trepalëshe për aleancë ushtarake mes Kosovës-Shqipërisë dhe Kroacisë ka ngjallur reagimin e ashpër të Serbisë e cila tha se kjo aleance paraqet kërcënim për sigurinë për popullin serb dhe mbarë rajonin.
