Në Shtime, duket se tryeza e kryetarit Qemajl Aliu është më e rrafshuar dhe më e shtruar se rrugët e qytetit. Nga mëngjeset panoramike në male, drekat me pamje pishinash e deri te darkat nën dritën e qirinjve, kreu i komunës e ka kthyer kalendarin e vitit në një udhëtim gastronomik me shpenzime të komunës.
Qemajl Aliu, i njohur si “Çlirimtari”, gjatë vitit 2024 ka derdhur mijëra euro nga buxheti komunal mbi tavolinat e restoranteve, kafeneve, hoteleve dhe resorteve. Dokumentet zyrtare tregojnë qartë se buxheti publik është shndërruar në një menu të hapur për kryetarin dhe zyrtarët e tij nga dreka në “Lisi”, te darka në “Soma” në Prishtinë.
Vetëm gjatë vitit fiskal 2024, fatura e drekave e darkave, bufesë komunale, por edhe ndonjë furnizim me pemë e perime, ka arritur në mbi 66 mijë euro.
Restorantet dhe resortet e preferuara
Në listën e shpenzimeve shfaqen rregullisht disa nga restorantet më të shtrenjta në Kosovë. Mes tyre, “Hija e Maleve” në Jezerc të Ferizajt, një destinacion i njohur për ushqim tradicional, por me çmime që ua heqin shijen edhe maleve.
Në Shtime, kryetari ka “zotuar” dukshëm “Aqua Park”-un si vendin më të dashur për mbledhjet e tij të punës.
Nuk mungon as “Marigo Resort” në Jezerc, ku faturat flasin më shumë se çdo raport pune, ndërsa lista vazhdon me “Gjyla”-n në Ferizaj dhe “Soma”-n në Prishtinë.
Përveç këtyre, mijëra euro janë paguar edhe për furnizime me ushqim e pije nga kompani si “Beni Dona”, “Dauti Comerc”, “Riki Invest”, “Premium Bakery”, “Besimi Comerc” e të tjera.
Në fund të ditës, qytetarët e Shtimes mund të ngushëllohen me faktin se edhe nëse nuk e kanë ndonjë rrugë të shtruar, të paktën e kanë një kryetar me shije të hollë. /Demokracia.com/
