Kryetari i Vetëvendosjes, deputeti Albin Kurti, nuk është prerazi i sigurt se do ta zbatojë Aktgjykimin e Gjykatës Kushtetuese e cila konstatoi se Avni Dehari, kryesuesi i seancës konstitutive, ka uzurpuar proceduralisht Kuvendin e Kosovës.
Kurti tha se ka zbatuar “gjithmonë” aktgjykimet e GjK-së edhe si kryeministër edhe si kryetar partie, por nxjerri një paramendim se pyetjet e shpeshta “a do ta respektoni?” e bëjnë mendojë në mos do të jetë i pazakonshëm dhe i papranueshëm Aktgjykimi, kur aktgjykimi veçse dihet.
“Nuk ka asnjë aktgjykim të Gjykatës Kushtetuese që Qeveria e Kosovës me mua si Kryeministër nuk e ka respektuar. Dhe nuk ka asnjë aktgjykim të Gjykatës Kushtetuese, të cilin edhe unë si kryetar i VV-së, nuk e kam respektuar. Por kur më pyesin sërish a do ta respektoj aktgjykimin e Gjykatës Kushtetuese kjo më bën të mendoj që do të jetë i pazakonshëm, i padrejtë, i padurueshëm, saqë ndoshta duhet ta konsiderojmë se çfarë duhet të bëjmë”, tha Kurti.
“Edhe një herë po e ritheksoj që ne gjithmonë i kemi respektuar aktgjykimet e Gjykatës Kushtetuese, por kësaj radhe për dallim nga 26 qershori e kemi vetëm njoftimin e Gjykatës Kushtetuese dhe e kemi aktgjykimin e plotë, i cili po vonohet, të cilin duhet ta lexojmë në tërësinë e tij. Më 26 qershor e kemi pasur në të njëjtën ditë njoftimin edhe aktgjykimin. Tash më 8 gusht e patëm njoftimin, por ja që ende nuk e kemi aktgjykimin. Kur ta lexojmë atë do ta themi vlerësimin tonë meritor. Por nuk është mirë që kemi këtë vonesë, por në bazë të njoftimit, në bindjen time, ka mospërputhje mes këtij aktgjykimi në versionin e plotë që jemi duke e pritur dhe 26 qershorit të po kësaj përvoje të Gjykatës Kushtetuese”, shtoi Kurti./Nacionale
