Kryeministrja daneze Mette Frederiksen ishte nikoqire e dy krerëve të Bashkimit Europian, presidenten e Komisionit Europian, Ursula von der Leyen, presidentin e Këshillit Europian António Costa, si dhe presidentin ukrainas Volodymyr Zelenskyy në Aarhus për të shënuar fillimin e udhëheqjes së Presidencës daneze të Këshillit të BE-së.
Kryesisht ata diskutuan se si Presidenca daneze e BE-së mund të mbështeste Ukrainën dhe ndër të tjera rrugën e vendit drejt anëtarësimit në BE, raporton Gazeta Express.
“Ukraina i përket Bashkimit Europian. Është në interesin si të Danimarkës ashtu edhe të Europës. Prandaj, Presidenca daneze e BE-së do të bëjë gjithçka që mundet për të ndihmuar Ukrainën në rrugën e saj drejt anëtarësimit në BE”, tha kryeministrja Frederiksen.
Kjo s’e përmendi Ballkanin Perëndimor megjithëse në prezantimin e prioriteteve, Presidenca daneze dha një zotim se do të avancojë negociatat e zgjerimit me Ballkanin Perëndimor.
Sidoqoftë, krahas Ukrainës, presidenti Costa tha se duhet të jetë edhe Ballkani Perëndimor.
“Mund të mbështetemi te Presidenca daneze për të çuar përpara negociatat me Ukrainën, dhe gjithashtu me Moldavinë dhe gjashtë vendet e Ballkanit Perëndimor”, tha Costa.
Mbështetja e shtuar ushtarake, bashkëpunimi me industrinë e mbrojtjes ukrainase dhe sanksionet e reja kundër Rusisë ishin gjithashtu në agjendë.
“Ne duhet ta forcojmë Ukrainën. Dhe duhet ta dobësojmë Rusinë. E para duke rritur mbështetjen ushtarake. Ukraina është thelbësore për sigurinë e Europës. Kontributi ynë në Ukrainë është gjithashtu një mbrojtje e lirisë sonë. E dyta, ne do ta arrijmë me sanksione. Ne duhet të rrisim presionin mbi Rusinë”, tha Mette Frederiksen.
Duke iu drejtuar kryeministres daneze, von der Leyen tha: “Si arritje e parë e Presidencës suaj, ju mund ta çoni paketën e 18-të në vijën e finishit”.
