Presidenti i Serbisë, Aleksandar Vuçiq, ka bërë një paralajmërim pas aksioneve të institucioneve të Kosovës në veri, duke thënë se Serbia do të presë një ‘”moment të favorshëm në marrëdhëniet ndërkombëtare” për veprim lidhur me Kosovën.
Komentet e Vuçiqit erdhën pasi autoritetet e Kosovës morën nën kontroll stacionet hekurudhore në Zveçan, Leposaviq dhe Leshak, objekte që institucionet kosovare i konsiderojnë si pjesë të strukturave paralele dhe ilegale të Serbisë.
Duke folur nga Kina, Vuçiq deklaroi se “serbët në Kosovë i presin shumë vështirësi”.
“Por është diçka që duhet ta mbajmë si barrë mbi shpinë dhe të presim një moment të favorshëm në marrëdhëniet ndërkombëtare kur Marrëveshja e Brukselit të mund të përmbushet dhe Karta e Kombeve të Bashkuara të mund të respektohet”, ka thënë Vuçiq, shkruan Danas.
Vuçiq akuzoi Perëndimin për, siç tha ai, “nxitje tensionesh dhe përndjekje të popullit serb”, ndërsa pretendoi se bashkësia ndërkombëtare po mban standarde të dyfishta ndaj Serbisë dhe Kosovës.
Teksa Vuçiq vazhdon retorikën e tij me paralajmërime dhe kërcënime, kujtojmë se në shtator 2023 në Banjskë, një grup i armatosur serb sulmoi Policinë e Kosovës, duke vrarë rreshterin Afrim Bunjaku. Përgjegjësinë për organizimin e atij sulmi e kishte marrë ish-nënkryetari i Listës Serbe, Milan Rado,çiq, i afërt edhe me presidentin serb.
Ndërkohë, ministri i Punëve të Brendshme në detyrë, Xhelal Sveçla, deklaroi se objektet e marra nën kontroll ishin ndër institucionet e fundit që vazhdonin të funksiononin nën strukturat paralele të Serbisë.
Më herët edhe Petar Petkoviq, drejtor i të ashtuquajturës Zyrë për Kosovën në qeverinë e Serbisë ka sulmuar kryeministrin në detyrë, Albin Kurti pasi institucionet e Kosovës morën nën kontroll stacionet hekurudhore në veri, duke i bërë thirrje serbëve që të “rreshtohen nën një bajrak” dhe të mbështesin Listën Serbe në zgjedhjet e 7 qershorit.
