Aktivisti shqiptar në SHBA, Harry Bajraktari, ka komentuar editorialin e të ngarkuarës me punë në Ambasadën amerikane, Anu Prattipati.
Sipas Bajraktarit, Kosova duhet të veprojë menjëherë.
Me këtë rast, ai u ka bërë thirrje institucioneve të Kosovës që të nisin punën me SHBA-në, në mënyrë që mundësia historike të mos humbasë.
“Kosova nuk guxon të krijojë varësi nga Rusia apo vende të tjera. Vetëm Amerika mund t’i ofrojë Kosovës pavarësi energjetike, siguri për qytetarët dhe bizneset, si dhe mbrojtje nga krizat që mund të vijnë në të ardhmen” tha Bajraktari.
Ky është deklarimi i plotë i tij:
Editoriali i të Ngarkuarës me Punë të Ambasadës së Shteteve të Bashkuara në Prishtinë, Anu Prattipati, flet për një çështje tejet të rëndësishme për të ardhmen dhe sigurinë kombëtare të Kosovës: pavarësinë energjetike përmes furnizimit me gaz natyror të lëngshëm amerikan dhe partneritetin afatgjatë me Amerikën.
Kosova duhet të veprojë menjëherë. U bëj thirrje institucioneve të Kosovës dhe të gjitha palëve të përfshira të nisin punën me Shtetet e Bashkuara që të mos humbet kjo mundësi historike. Kosova nuk guxon të krijojë varësi nga Rusia apo vende të tjera. Vetëm Amerika mund t’i ofrojë Kosovës pavarësi energjetike, siguri për qytetarët dhe bizneset, si dhe mbrojtje nga krizat që mund të vijnë në të ardhmen.
Po ashtu, partneriteti serioz dhe afatgjatë me mikun tonë më të madh, Shtetet e Bashkuara të Amerikës, krijon kushte për më shumë investime amerikane dhe një ekonomi më të fortë për qytetarët e Kosovës.
Zoti e bekoftë Amerikën
Zoti e bekoftë Kosovën dhe mbarë popullin shqiptar.
