Banorët e fshatit Dedi të komunës së Mitrovicës përmes një letre publike kanë demantuar Hasan Pretenin, i cili kishte deklaruar se Jahir Dedia Nimani nga ky fshat nuk ka qenë luftëtar i UÇK-së.
Fshatarët e këtij fshati, një pjesë e tyre ish ushtar të UÇK, kanë konfirmuar se Jahir Dedia Nimani ka qenë pjesë e UÇK-së, madje madje udhëheqës i njësitit të parë në Dedi.
Ata kanë thënë se ndihen të fyer si fshat pas pretendimeve të pavërteta të Hasan Pretenit.
Letra e plotë:
REAGIM i Fshatarëve të Fshatit Dedi, Mitrovicë
Ne, fshatarët e fshatit Dedi, Komuna e Mitrovicës, të mbledhur në tubimin e sotëm të
datës 18.10.2025, ku disa prej nesh janë veteranë – për të mos thënë të gjithë janë
veteranë të Ushtrisë Çlirimtare të Kosovës (UÇK) – deklarojmë se pretendimet e z. Hasan
Preteni ndaj bashkëfshatarit e bashkëluftëtarit tonë z.Jahir Dedia Nimani nuk janë të
vërteta dhe ndihemi të fyer të gjithë si fshat. Këto akuza janë me qëllim përçarje në mes
popullit shqiptar, sidomos ish-luftëtarëve të UÇK-së të zonës së Shalës.
Për dijeni të z. Preteni, i cili ka ardhur më vonë se të gjithë të pranishmit në zonën e
Shalës, duhet të kuptojë se celulat e para të UÇK-së në Shalë kanë filluar në Zabërgjë,
nga themeluesi Nexhat Dedia, me disa nga shokët e tij. Betejën frontale në Shalë e ka
udhëhequr eprori nga Dedia, Ajet Bajrami Dedia, në Mazhiq. Ushtari i parë hero i
Kosovës që është vrarë me pushkë në dorë është heroi Avni Shabani Dedia, ku në atë rast
pati mbetur i plagosur rëndë (i lënë për të vdekur) z. Fadil Dedia.
Njësiti i parë i themeluar në Dedi është udhëhequr nga Jahir Nimani Dedia, kur ti, z.
Preteni, shijoje jetën tënde dhe ende nuk kishe ardhur të lajmëroheshit për luftë në zonën
e Shalës. Z. Preteni, duhet ta dini – dhe urojmë që memoria t'ju ketë tradhtuar e jo ideali i
UÇK-së – se vendstrehimi i njësitit në fshatin Dedi ishte pikërisht shtëpia dhe familja e
Jahir Niman Dedisë dhe Avni Shabani Dedia.
Përcaktimin e njësitit dhe detyrave të tyre e ka përcaktuar sipas hierarkisë Brigada 141
"Mehë Uka" dhe komandanti i respektuar Hysni Ahmeti. Fshatarët e fshatit Dedi kanë
qenë ushtarë të shpërndarë në të gjitha pikat e UÇK-së në Zonën Operative të Shalës.
Neve na vjen me të vërtetë keq që duhet të reagojmë për mbrojtjen e kontributit të
ushtarëve të UÇK-së, nga një njeri që ka qenë bashkëluftëtar i yni dhe ishte një nga
eprorët e fundit që iu bashkove UÇK-së, e që e di fort mirë se jemi munduar të
respektojmë gjithmonë. Megjithatë, jemi të detyruar të mbrojmë të vërtetën e luftës dhe të
gjithë ata që kanë dhënë kontributin e tyre të pashoq në luftë ndaj okupatorit serb.
Respekt për jetë nga veteranët e UÇK-së të fshatit Dedi.
LAVDI PËR HEROIN AVNI SHABANI DEDIA dhe të gjithë të rënët në luftë në
tërë territorin e Kosovës, të cilët qëllim kishin që sot ne ta gëzojmë lirinë dhe jo të
tentojmë të përçahemi!
Në emër të fshatarëve të fshatit Dedi, Veteranët dhe kontributdhënësit e UÇK-së.
Në fshatin Dedi me dt.18/10/2025
