Anëtarët e Këshillit Drejtues të zgjedhur nga Senati i Universitetit “Fehmi Agani” në Gjakovë kanë denoncuar në Ministrinë e Arsimit, Shkencës, Teknologjisë dhe Inovacionit, si dhe organet e brendshme të universitetit, për gjendjen e krijuar brenda institucionit, duke akuzuar rektorin Prof. Ass. Dr. Drilon Bunjaku për një varg shkeljesh, shkruan Insajderi.
Këshilli Drejtues ka listuar një numër gjetjesh që, sipas tyre, përbëjnë një “dosje të plotë të keqmenaxhimit”.
Aty përfshihen tejkalime të mëdha buxhetore, ndërhyrje në punën e organeve qeverisëse, manipulim të të dhënave, shkelje të procedurave akademike, centralizim të kompetencave, presion ndaj anëtarëve të Këshillit, si dhe dëmtim serioz të integritetit institucional.
Mes problemeve me të theksuara është tejkalimi drastik i buxhetit në disa kategori, ku disa zëra arrijnë mbi 900% dhe madje 1,040% të buxhetit të aprovuar. Po ashtu, theksohet se universiteti është aktualisht pa asnjë prorektor, ndonëse një gjë e tillë është e detyrueshme me Statut.
Këshilli Drejtues gjithashtu akuzon rektorin për:
- Shkelje të privatësisë dhe përdorim të kamerave pa autorizim
- Ndërhyrje në procesverbalet dhe vendimmarrjen e organit
- Pengim të stafit akademik në aplikime shkencore
- Manipulim të të dhënave të Webometrics dhe ORCA
- Vendimmarrje selektive dhe trajtim preferencial të menaxhmentit
- Ndërprerjen e transmetimeve të mbledhjeve të Senatit pa vendim zyrtar
Anëtarët e Këshillit Drejtues deklaruan se menaxhimi aktual ka cenuar rëndë funksionimin e institucionit dhe standardet akademike, duke kërkuar dorëheqjen e rektorit si hap të domosdoshëm për stabilizimin e situatës.
Tejkalimi i buxhetit
Në denoncimin e dorëzuar në MASHT përmenden shembuj konkret se si është tejkaluar buxheti
- Akomodimi për udhëtime jashtë vendit – tejkalim prej 236.96%
- Shërbimet e shtypjes/printimit – tejkalim prej 236.86%
- Shërbime të tjera kontraktuese – tejkalim prej 259.17%
- Pajisje nën 1,000 € – tejkalim prej 913.43%
- Mirëmbajtja e TI-së – tejkalim rekord prej 1,040.09%
- Drekat zyrtare – tejkalim prej 194.96%
Sipas Këshillit Drejtues, pavarësisht kërkesave të shumta për raportim të plotë financiar, rektori ka dërguar vetëm tabela me të njëjtat të dhëna, pa ofruar asnjë arsyetim apo shpjegim ligjor për shpenzimet e jashtëzakonshme.
Universiteti pa prorektor
Dokumenti i dorëzuar në MASHT thotë se Universiteti “Fehmi Agani” është i vetmi universitet publik në vend që ka funksionuar për muaj të tërë pa asnjë prorektor.
Aty thuhet se tre prorektorët kanë dhënë dorëheqje njëri pas tjetrit, si rezultat i ndërhyrjeve të rektorit.
Sipas dokumentit po ashtu komisionet themelore të universitetit, shtylla kryesore e funksionimit akademik janë jofunksionale:
- Komisioni i Studimeve
- Komisioni i Etikës
- Komisioni i Ankesave dhe Parashtresave
- Komisioni për Kërkime Shkencore
Akuza për presion
Dokumenti përfshin akuza serioze që përbëjnë shkelje të rënda të etikës profesionale:
- Ftesa individuale në zyre për presion
- Refuzim për mbajtjen e procesverbaleve gjatë takimeve
- Ndërhyrje të drejtpërdrejta në procesverbalet ekzistuese
- Tentim për të ndikuar votimin në Këshillin Drejtues
Në një nga pikat, përmendet shkelja e privatësisë përmes: Qasjeje të paautorizuar në kamerat e universitetit
Dokumenti përmend edhe përdorimin e veturës zyrtare nga rektori për udhëtime personale brenda dhe jashtë vendit, që mund të përbëjë keqpërdorim të detyrës zyrtare.
Rektori mohon akuzat, Ministria hesht
Gazeta Insajderi i ka dërguar pyetje Ministrisë së Arsimit lidhur me denoncimin e bërë nga Këshilli Drejtues, por të njëjtit nuk kanë kthyer përgjigje.
Në anën tjetër, rektori Drilon Bunjaku, ka publikuar në YouTube një seri videosh, ku mohon akuzat për keqpërdorim.
“Që një kohë Këshilli Drejtues po tenton të më pengojnë në punët e mira që kam ba dhe do vazhdoj të kontribuoj. Në muajin prill kam adresu ankesat e mija se stafi po vin pak në punë. Kemi staf akademik që vin një herë në jave dhe të tjerë që nuk vin fare. Para Këshillit Drejtues kam kërku që të marrin masa dhe ata nuk kanë ndërmarrë asgjë dhe kam marr vendim që stafi akademik të viijnë të paktën tre herë në javë në punë. Kam implementu vendimin dhe kur ka ardh koha të marrë masa ndaj dy prej anëtarëve të Këshillit, ata e marrin vendimin që të pezullohet vendimi për vijueshmëri”, tha ai.
Ai tha se Këshillit Drejtues po i pengon llogaridhënia.
