Deputeti i LDK-së, Paris Guri, ka njoftuar se ka dorëzuar ankesë kundër vendimit të Prokurorisë për pushimin e hetimeve në rastin e Faton Pecit dhe Fitore Pacollit, lidhur me ndarjen e granteve nga Ministria e Bujqësisë, transmeton Gazeta Online Veriu.info.
Deputeti Guri ka bërë të ditur se ditëve në vijim do t’i bëj publike edhe dëshmitë e dhëna para Prokurorisë nga vetë punonjësit e kësaj Ministrie, dëshmi tronditëse, që e bëjnë të pakuptueshëm vendimin për pushimin e hetimeve, sipas tij.
Postimi i plotë:
As shpifjet, as sulmet, as presioni nuk më ndalin!
Sot kam dorëzuar ankesën kundër vendimit të Prokurorisë për pushimin e hetimeve në rastin e Faton Pecit dhe Fitore Pacollit, lidhur me ndarjen e granteve nga Ministria e Bujqësisë.
Gjatë ditëve në vijim do t’i bëj publike edhe dëshmitë e dhëna para Prokurorisë nga vetë punonjësit e kësaj Ministrie. Dëshmi tronditëse, që e bëjnë të pakuptueshëm vendimin për pushimin e hetimeve!
Sot kam dorëzuar gjithashtu edhe padinë për shpifje kundër Faton Pecit, për akuzat e tij publike ndaj meje, të cilat, përveçse janë të pavërteta, janë edhe trillime që vetëm një mendje me një hall të madh mund t’i bëjë.
Kush ka prova, le t’i paraqesë para drejtësisë. Kush shpif, le të mbajë përgjegjësi, prapë para drejtësisë.
Nëse dikush mendon se me sulme personale mund të më ndalë të kërkoj llogari për paranë publike, e ka gabim rëndë.
Unë nuk hesht. Nuk tërhiqem. Nuk zmbrapsem.
Paraja publike nuk është pronë private e askujt. E vërteta nuk mbulohet me shpifje.
Kjo çështje nuk përfundon këtu!
