Deputetja e Lëvizjes Vetëvendosje, Fitore Pacolli, ka paralajmëruar se mbindërtimet janë duke vazhduar në kryeqytet.
Përmes një video të shpërndarë në rrjetin e saj social, Pacolli ka shfaqur një ndërtesë banimi e cila ka filluar mbindërtimin në lagjen “Arbëria” në Prishtinë.
Sipas saj, mbindërtimet në Prishtinë janë një fenomen “natyror” që shtohen sikur drunjtë në pranverë.
Ajo ka përmendur edhe projektin për Shërbimet e Arkitektit të Kryeqytetit që i ka kushtuar miliona euro buxhetit të komunës, duke e akuzuar LDK-në se mbindërtimet i ka traditë.
“Në Prishtinë po ndodh një fenomen “natyror”: ndërtesat po rriten si drunjtë në pranverë.
Mbindërtimet po shtohen si copa legoje, pa leje, pa kriter, e mbi të gjitha pa asnjë kujdes për sigurinë. Rreziku rritet bashkë me katet, por Kryetarit nuk i bën përshtypje. 12 milionë euro për Shërbimin e Arkitektit të Kryeqytetit? Me sa duket, për të projektuar paligjshmërinë me dorë të lirë. Kur LDK udhëheq në Prishtinë, banesat 10-katëshe bëhen 11, ato 11 bëhen 12… Është traditë e LDK-së që trashëgohet e ruhet ndër breza”, thuhet në reagimin e saj.
