Mbrëmë u raportua për një rast në Obiliq, ku dje rreth orës 16:00 në rrugën ‘Hasan Prishtina’ dëgjuar të shtëna me armë zjarri.
Një 32-vjeçar dyshohet se ka shtënë gjashtë herë me armën e tij në drejtim të burrit i cili denoncoi rastin në Polici, raporton Gazeta Sinjali.
Sinjali mëson se njësitet policore i janë përgjigjur thirrjes për ndihmë, ku në vendin e ngjarjes kanë hasur në viktimën, i cili ka rrëfyer para tyre gjithë atë që ndodhi. Sipas 47-vjeçarit, një person ka shtënë me armë zjarri në drejtim të tij e më pas është larguar me veturë në drejtim të panjohur.
Policia në vendin e ngjarjes ka gjetur dhe sekuestruar gjashtë gëzhoja të cilat dyshohet se janë të armës që u përdor në rast, teksa janë ndërmarrë të gjitha veprimet hetimore që të kapet i dyshuari.
Në vargun e veprimeve hetimore, me urdhër të Gjykatës, njësitet policore kanë kryer bastisje në shtëpinë e të dyshuarit, mirëpo nuk është gjetur asgjë e dyshimtë.
Me urdhër të prokurorit, rasti është iniciuar ‘Vrasje në tentativë’, ndërsa veprimet tjera do merren posa të kapet i dyshuari i cili është shpallur në kërkim policor.
