Nuk e di, nuk e kuptoj dhe as nuk e imagjinoj dot arsyen apo arsyet e kreut të shtetit që në fund të mandatit të saj shpikë shifra të tilla, gjithsesi të dëmshme si të pavërteta që janë.
Shkruan: Burim Ramadani
Kur po bëja një hulumtim mbi influencën armiqësore ruse në Ballkan e në Kosovë, në vitin 2017 për SPRC-në, një prej gjetjeve më doli se propaganda ruse e etiketonte Kosovën si “enklavë kriminale dhe strehë për banditë e terroristë”!
Një propagandë e këtillë ishte dhe mbetet pjesë e Luftës Hibride ruse kundër Kosovës dhe Perëndimit. Kjo sepse shtrembërimi i së vërtetës së Kosovës është një prej mënyrave që kjo Perandori e së Keqes vazhdon ta zhvillojë me qëllimin e delegjitimimit të ndërhyrjes së drejtë të NATO-s në vitin 1999 dhe delegjitimimit të shtetësisë së Kosovës.
900 banda kriminale – së paku dezinformatë
Pas 18 vjetësh, opinioni publik perëndimor dëgjoi nga Presidentja e Kosovës se gjatë pesë viteve të fundit në Kosovë janë shkatërruar 900 banda kriminale dhe është arritur prerja (shkëputja) e Mafias së Ballkanit. Nuk po besoja titujt derisa dëgjova fjalë për fjalë këtë intervistë, edhe të shqipëruar në titra.
Shkatërrimi i 900 bandave kriminale është së paku dezinformatë. Termi ‘bandë’ as nuk ekziston në Kodin Penal të Republikës së Kosovës. Rrjedhimisht, adresimi presidencial me termin ‘bandë’ është një tregues elementar që gjuha e përdorur është retorikë, ndërsa përmbajtja del të jetë e pabazuar dhe e paqëndrueshme në të vërtetën e Kosovës.
Nuk e di, nuk e kuptoj dhe as nuk e imagjinoj dot arsyen apo arsyet e kreut të shtetit që në fund të mandatit të saj shpikë shifra të tilla, gjithsesi të dëmshme si të pavërteta që janë.
Rrejdhimisht, adresimi i këtillë me shifra të sajuara nuk e përfaqëson të vërtetën e shtetit tonë demokratik, i cili në vazhdimësi është ‘nikoqir’ i prezencës ndërkombëtare ushtarake të udhëhequr nga NATO dhe misioneve ndërkombëtare/rajonale për sundimin e ligjit.
Ndërsa, prerja e “mafias së Ballkanit” mund të jetë një temë e thellë për t’u analizuar e kujdes e pa emocione. Të dhënat për këtë nuk janë të formësuara për publikun, prandaj edhe konstatimi i këtillë është retorikë në ajër. Por, duke qëndruar në këtë retorikë, atëherë pajtohe që “Mafia e Ballkanit” duhet të shkatërrohet. Kjo duhet të ndodh në energjetikë, si shembull. Në këtë fushë, këto vite ka lulëzuar aktiviteti i organizuar kriminal, për të cilën denoncimet publike janë të shumta edhe brenda Kosovës.
Raportet e Policisë demantojnë Presidenten
Të diskutuarit me shifra është pjesa që më pëlqen më së shumti. Sepse, ato mund të lejojnë interpretim, por në asnjë mënyrë nuk lejojnë korrigjim e manipuim faktesh.
Se si e gjeti shifrën prej 900 “bandash” kriminale të shkatërruara për 5 vjet, vetëm Presidentja mund ta dëshmojë para popullit të Kosovës!
Sepse, Policia e Kosovës është edhe profesionale, edhe transparente. Për çdo vit, Policia publion Raportin Vjetor, që fatmirësisht është mjaftueshëm i detajuar.
Kështu, raportet e Policisë në pesë vitet e fundit japin këto shifra:
– Në vitin 2020, janë shkatëruar 28 grupe kriminale.
– Në vitin 2021, janë shkatërruar 49 grupe kriminale.
– Në vitin 2022, janë shkatëruar 34 grupe kriminale.
– Në vitin 2023, janë shkatëruar 23 grupe kriminale.
– Në vitin 2024, janë shkatërruar 25 grupe kriminale.
Përkatësisht, për pesë vitet e raportuara janë shatërruar 159 grupe kriminale. Pra, 28+49+34+23+25=159.
P. S
Zëdhënësi i Presidentes tentoi ta korrigjojë shefen e tij. Gjithsesi, ishte e pakorrigjueshme ajo dezinformatë, sepse shifrat për rastet e trajtuara nga institucionet e Kosovës në lidhje me grupet e organizuara kriminale nuk lidhen kurrsesi me numrin 900. Por, kjo të paktën tregon se edhe këta vet e kanë parë se çfarë dezinformate ishte deklarata e Presidentes. Përndryshe, nuk do ta merrnin mundin të tentojë korrigjimin e shefes së tyre.
