Ismet Osmani “Curri”, gjendet në arrati pasi po dyshohet të jetë i përfshirë në një tentim vrasje. “Curri”, nga 2019 gjendet nën masën e dorëzanisë prej 50 mijë euro në rastin ku po gjykohet si i akuzuar për fajde.
Gjykata e kishte njoftuar Currin për pasojat nëse eventualisht nuk do të përgjigjej në ftesat e gjykatës për tu gjykuar. Në rast të shkeljes së kushteve të dorëzanisë, vlera prej 50 mijë eurove do shkonte në buxhetin e shtetit.
Kështu, në Gjykatë ka paraqitur disa raporte mjekësore, me pretendimet se arsye pse ka munguar në seancën ku po gjykohet për fajde është se ai po trajtohet jashtvendit.
Dokumentet mjekësore të cilave Apeli ua kishte falur besimin, ka dyshime për falsifikim.
Gjykata Themelore në Prishtinë, ka bërë kërkesë në spitalin “Euroitalia”, nëse Ismet Osmani ishte hospitalizuar aty.
Por në përgjigjen e vetë spitalit, kjo mohohet.
Betimi për Drejtësi, ka siguruar ketë përgjigje nga spitali, ku thuhet se fletëleshimi nuk është lëshuar nga institucioni i tyre.
Objekti i tyre nuk kryen veprimtari 24/7 dhe nuk hospitalizon pacientë që nga korriku i vitit 2022.
Vula dhe nënshkrimi i fletë lëshimit nuk janë të Dr. Gjoko Spasevsi, dhe as nuk është kryer ndonjë ekzaminim ndaj këtij pacienti.
Për përkthimin e kësaj përgjigje nga gjuha maqedonase në gjuhen shqipe, sipas burimeve të Betimit për Drejtësi gjykata ka pritur rreth 3 javë ndonëse përkthimi i tyre ishte me karakter urgjent.
Betimi për Drejtësi, ka kërkuar nga Gjykata Themelore në Prishtinë të na njoftoj se kur është kërkuar përkthimi dhe pse ka pasur vonesa.
“Më datë 29.08.2024 dhe 04.09.2024 nga gjyqtarja e çështjes janë përcjellë shkresat te zyrtarja për përkthim. E njëjta e ka njoftuar gjyqtaren se për shkaqe shëndetësore, nuk ka mundësi të bëjë përkthimin e shkresave deri në kohën kur është kërkuar nga gjyqtarja e rastit, andaj me qëllim që shkresat të përkthehen dhe procedura të mos zvarritet, gjyqtarja i ka përcjellë të njëjtat për përkthim tek përkthyesi tjetër me datë 06.09.2024, ndërsa i ka pranuar shkresat e përkthyera me datë 10.09.2024”, thuhet në përgjigjen e zyrtares për informim, Mirlinda Gashi.
: Pasi gjykatësja Bytyqi ka marrë shkresën e përkthyer ku thuhej se Ismet Osmani nuk ka qenë asnjëherë pacient në Spitalin “EuroItalia”, ajo ka dërguar një njoftim zyrtar prokurorit të shtetit duke e njoftuar lidhur me këtë situatë.
Sipas burimeve të Betimi për Drejtësi, ky rast tashmë është duke u hetuar nga prokuroria për falsifikim të dokumenteve.
Por, ndonëse e gjithë kjo dyshohet të këtë ndodhur gjatë procedimit të rastit për fajde, prokurori i kësaj lëndë Armend Hamiti nuk është duke e trajtuar këtë rast.
”Nuk jam duke e trajtuar pasi ky rast është regjistruar si rast i ri dhe është duke e trajtuar dikush nga kolegët në Prokurorinë Themelore në Prishtinë”, ka thënë Hamiti
Këtë rast, po e trajton prokurori Besart Mustafa i cili nuk ka treguar se kush po hetohet.
“Dërgoje një email për rastin dhe këta zyra për informim më pas të kthejnë përgjigjen”, ka thënë ai.
Gazetarja: E kuptoj, por po ju pyes juve a keni marrë aktvendim për fillim të hetimeve dhe nëse po..
Burimet nga prokuroria bëjnë të ditur se Mustafa po heton Currin për falsifikim ndërsa avokatin Berisha si dëshmitar.
Lidhur me mungesën e Currit në seancën e krejt të ngjarat pas saj, Betimi për Drejtësi ka tentuar të marrë në intervistë avokatin Besnik Berisha, por ai nuk i është përgjigjur as kërkesës me shkrim e as thirrjeve telefonike.
Për të gjitha këto dhe më shumë, ndiqeni hulumtimin “Vendimet kontraverse të gjykatave – Si Curri “shpëton” nga drejtësia përmes falsifikimeve mjekësore?”, në Betimi për Drejtësi, KTV dhe TVArta./BetimipërDrejtësi
