Borussia Dortmund ka nisur të planifikojë me kujdes sezonin e ardhshëm, ndërsa në klub po përmenden disa emra të rinj për merkaton e verës. BVB tashmë ka konfirmuar tri afrime: Justin Lerma, Kaua Prates dhe Joane Gadou, por lista e objektivave duket se është edhe më e gjatë.
Sipas Sky, Dortmundi po monitoron mesfushorin e Brighton & Hove Albion, Matt O’Riley. Drejtuesit e klubit kanë mbledhur informacione për 25-vjeçarin danez dhe kanë shqyrtuar kushtet e mundshme të transferimit. Si skautët, ashtu edhe trajneri Niko Kovač, thuhet se janë të impresionuar nga profili i tij.
Paralelisht, skautët e BVB-së po ndjekin edhe Vasilije Kostovin e Crvena Zvezdës. Mesfushori 18-vjeçar ka kontratë me klubin serb deri në vitin 2028, ndërsa agjenti i tij raportohet se ka vizituar Dortmundin disa javë më parë për bisedime paraprake.
Megjithatë, transferimi i tij nuk do të ishte i lirë. Kostov pritet të kushtojë rreth 25 milionë euro dhe po ndiqet gjithashtu nga RB Leipzig, Interi dhe disa klube të mëdha të Premier League.
Në repartin ofensiv, Dortmundi vazhdon të monitorojë anësorin e majtë të Arsenalit, Ethan Nwaneri. Drejtori sportiv Ole Book ka bërë interesime të reja për 19-vjeçarin, i cili thuhet se është i hapur për një kalim në “Strobelallee”.
Ndërkohë, Serhou Guirassy ka dhënë një vlerësim të qartë për sezonin e Dortmundit. Vendi i dytë në Bundesliga, eliminimi në “play-off” të Ligës së Kampionëve dhe largimi nga Kupa e Gjermanisë në raundin e 16 më të mirëve kanë lënë shije të hidhur te sulmuesi.
I pyetur për momentin më të mirë të sezonit, Guirassy u përgjigj hapur: “Të jem i sinqertë, nuk kishte shumë, sepse nuk fituam asgjë. U eliminuam nga kupa, u eliminuam nga Liga e Kampionëve, kështu që nuk pati shumë momente të mëdha.”
Reprezentuesi i Guinesë shtoi se vendi i dytë nuk mund të konsiderohet i mjaftueshëm për një klub si Dortmundi.
“Edhe vendi i dytë nuk na mjafton, sepse kur luan për Dortmundin, dëshiron të fitosh tituj. Bundesliga është e vështirë, por dështuam edhe në Kupën e Gjermanisë, kështu që nuk pati vërtet momente të mëdha këtë sezon,” tha ai.
Guirassy prej kohësh është lidhur me një largim gjatë verës. Sipas raportimeve, Fenerbahçe ka bërë përparim të rëndësishëm në bisedimet me 30-vjeçarin. Presidenti i klubit turk, Sadettin Saran, ka zhvilluar një takim ballë për ballë me sulmuesin e Dortmundit, ndërsa raportohet për një “marrëveshje në parim”.
Edhe pse Guirassy ka kontratë me Dortmundin deri në vitin 2028, Sky Sport raporton se ai tashmë ka vendosur të largohet këtë verë. Deri tani nuk ka pasur qasje zyrtare nga klube të mëdha si Real Madridi apo Manchester City, të cilat do të mund ta aktivizonin klauzolën e tij prej 40 milionë eurosh.
Megjithatë, interesimi për të nuk mungon. Përveç Fenerbahçes, edhe Tottenham Hotspur dhe AC Milan thuhet se po e monitorojnë nga afër situatën e sulmuesit. /GazetaExpress/
