Pas publikimit të informatave se Komuna e Mitrovicës ka bartur mjete nga buxheti i arsimit për mirëmbajtjen e luleve dhe hapësirave të gjelbra, ka reaguar edhe drejtoresha e shkollës “Andon Zako Çajupi”, duke ngritur shqetësime për gjendjen e rëndë në institucionet arsimore.
Ajo thotë se shkollat në Mitrovicë përballen me mungesa të shumta, ndërsa kushtet në shkollën që drejton janë larg standardeve të nevojshme për zhvillimin normal të procesit mësimor.
Sipas saj, në shkollë mungojnë gjërat elementare, si inventari bazë, mjetet teknologjike dhe ato higjienike, ndërsa dyshemetë e dëmtuara, muret që prej vitesh nuk janë lyer dhe infrastruktura e amortizuar kërkojnë investime urgjente.
“Shkollat në Mitrovicë janë në gjendje të mjerueshme. Në veçanti po flas për shkollën që e udhëheq. Mungojnë gjërat elementare, inventari, mjetet teknologjike dhe ato higjienike. Dyshemetë janë të dëmtuara, muret kanë nevojë për renovim, ndërsa infrastruktura është e stërvjetruar”, ka deklaruar ajo.
Drejtoresha ka theksuar se shkolla, ndonëse ndodhet në qendër të qytetit, ende nuk është pajisur me kamera sigurie, pavarësisht kërkesave të vazhdueshme. Ajo ka përmendur edhe mungesën e sekretarit, asistentëve për fëmijët me nevoja të veçanta dhe stafit teknik.
“Nuk po flas kundër askujt, por po kërkoj kushte më të mira për arsimin. Shtylla e një kombi është arsimi, andaj kërkojmë kushte më të mira për nxënësit tanë”, është shprehur ajo.
Reagimi vjen në kohën kur është bërë e ditur se Komuna e Mitrovicës ka bartur mjete nga disa institucione arsimore për financimin e mirëmbajtjes së luleve dhe hapësirave të gjelbra.
