Policia e Kosovës, konkretisht Njësia për Hetimin e Krimeve Ekonomike dhe Korrupsionit ka arrestuar sot katër persona në Gjakovë, të cilët po dyshohen për veprën penale “Keqpërdorim i pozitës apo autoritetit zyrtar”.
Sipas sinjalit të arrestuarit janë: Arben Bakalli, Drejtor i Urbanizmit në Komunën e Gjakovës, Afërdita Lama, ish-Drejtoreshë e Kadastrës, tashmë në pension, Elida Bejtullahu, urbaniste, dhe Arianit Kupa, zyrtar.
Veprimet e tyre të dyshuara lidhen me procedura të kundërligjshme brenda institucioneve komunale, për çka janë ndaluar për 48 orë me vendim të Prokurorisë Themelore në Gjakovë.
Gazeta Insajderi në vitin 2024 kishte raportuar rreth drejtorit të Urbanizimit, Arben Bakallit dhe dy zyrtarëve tjerë.
Arben Bakalli, Agron Gojani dhe Zenel Shabani, janë zyrtarët ndaj të cilëve vitin 2023 ishte ngritur aktakuzë. Të njëjtit dyshoheshin për “Keqpërdorimi i pozitës apo autoritetit zyrtar”. Insajderi pati raportuar për të lartpërmendurit, se edhe pse në procese gjyqësore kishin vazhduar të ushtrojnë pozitat e tyre në Drejtorinë e Urbanizmit.
Gazeta Insajderi lidhur me këtë, asaj kohe kishte pyetur kryetarin e kësaj Komunë, Ardian Gjini, i cili kishte thënë se nuk ka ka ndonjë vendim të formës së prerë nga Gjykata, dhe prandaj të njëjtit janë duke mbajtur pozitat që kanë.
Çka thuhej në aktakuzën e ngritur ndaj zyrtarëve të Komunës se Gjakovës?
Gjykata Themelore në Gjakovë, me 29.12.2023, kishte ngritur aktakuzë ndaj Arben Bakalli, Agron Gojani dhe Zenel Shabani.
Ata dyshohet se në bashkëveprim kishin kryer veprën penale “Keqpërdorimi i pozitës apo autoritetit zyrtar“.
Sipas aktakuzës, të njëjtit me qëllim të përfitimit të dobisë pasurore, kishin dhënë leje ndërtimi në kundërshtim me ligjin.
“Me datën 10.06.2020, në objektin e Komunës së Gjakovës, të pandehurit duke vepruar si bashkëkryerës e duke shfrytëzuar detyrën zyrtare tejkalojnë kompetencat e tyre me qellim të përfitimit të dobisë pasurore për Teki Dobruna nga Gjakova, në atë mënyrë që i pandehuri Arben si Drejtor i Drejtorisë për Planifikim Urban dhe Mjedis, lëshon Vendim për leje ndërtimi të ndërtesës shumë banesore me nr.07/351/02-11828, ndërsa i pandehuri Agron si Urbanist i Sektorit për Planifikim dhe Rregullim Urban, njëherit bartës i lëndës, pranon që të lëshohet leje për ndërtimin e ndërtesës shumë banesore me nr.07/351/02- 11828, gjersa i pandehuri Zenel si Zyrtar i lartë për çështje juridike pranë kësaj drejtorie, harton vendimin për pajisje me leje ndërtimi të lartcekur, sipas kërkesës së Teki Dobruna, dhe atë në kundërshtim me nenin 21 par.1 dhe 2 të Ligjit për Ndërtim Nr.04/L-110, leje kjo për ndërtimin e objektit të kategorisë së dytë, me destinim objekt me shumë njësi, me afarizëm në përdhesë me etazhitet B+P+5+KSH, në parcelën kadastrale me nr. 5105-28 ZK Gjakovë-Qytet, dhe në kundërshtim me planin rregullues urban “Jugu 2”, ashtu që me këtë veprim investitorit i’a lejojnë ndërtimin e objektit duke ia mundësuar përfitimin e dobisë pasurore përmes rritjes së sipërfaqes së objektit prej rreth 563 m²“, thuhej në aktakuzën e siguruar nga Gazeta Insajderi.
