Pas një humbjeje befasuese 0:1 në stadiumin Santiago Bernabéu nga Getafe, trajneri Álvaro Arbeloa u shpreh i zhgënjyer, duke reaguar ashpër ndaj një prej lojtarëve të tij dhe duke e mbrojtur gjithsesi paraqitjen e skuadrës.
Ndeshja u vendos nga një gol i Martin Satrianos për Getafen, i cili shënoi me një vole të jashtëzakonshme në pjesën e parë, duke ia dhënë ekipit vizitor një fitore të rëndësishme në Bernabéu.
Kjo humbje i lë madrilenët katër pikë prapa rivalit të tyre kryesor, Barcelona, në garën për titullin në La Liga, shkruan “Gazeta Express”.
Në konferencën për shtyp pas ndeshjes, Arbeloa theksoi se skuadra krijoi më shumë shanse se Getafe, por nuk arriti t’i shfrytëzonte ato.
Ai gjithashtu e pranoi përgjegjësinë e humbjes.
“Nuk është e pamundur të luajmë mirë — patëm shanse të qarta me Vinicius, Rudiger, Rodrygo… por nuk arritëm të shënojmë. Përmirësimi i lojës është përgjegjësi e imja. Nëse dikush është përgjegjës për humbjen, ai jam unë.”
“Ne nuk e kemi një objektiv tjetër pos t’i fitojmë 36 pikë që kanë mbetur në garë. Ky është Real Madridi dhe askush nuk dorëzohet këtu. Është një hapësirë (shkëputje e Barcelonës) që mund ta shkrijmë.”
Arbeloa nuk i kurseu as kritikat ndaj njërit prej lojtarëve të tij, duke e cilësuar si “të papranueshëm” kartonin e kuq që e mori Franco Mastantuono për protestë ndaj gjyqtarit — një situatë që do ta lërë atë jashtë skuadrës për ndeshjen e radhës.
Humbja e Real Madridit nga Getafes jo vetëm që i shqetëson tifozët, por edhe e vendos ekipin prapa në garën për titull — me Barcelonën tani me një epërsi të dukshme në renditje. /Gazeta Express
