Agjencia e Ushqimit dhe Veterinarisë ka publikuar rezultatet e kontrollit në sektorin e qumështit. AUV, tha se nga 495 mostra që janë analizuar kanë dalë 93 mospërputhje, 46 prej të cilave kanë të bëjnë me deklarimin dhe praninë e vajit të palmës.
“Kontrollet tona kanë evidentuar se një numër i madh operatorësh nuk posedonin autorizime të veçanta për përpunimin e produkteve që përmbajnë vaj palme, yndyrë bimore, qumësht pluhur apo përbërës tjerë zëvendësues”, tha Kryeshefi i Agjencisë, Bekim Hoxha.
Ajka Sh.P.K. është kompania së cilës iu detektuar vaji i palmës të cilën nuk e kishte deklaruar. Kësaj kompanie ju detektua edhe yndyrë bimore por e cila nuk ishte deklaruar në paketimin e produktit.
Kjo kompani është në pronësi të Ramadan Memajt i cili drejton Shoqatën e Qumështoreve të Kosovës, e cila vazhdon të prezantohet publikisht si përfaqësuesja kryesore e industrisë së qumështit në vend.
Megjithatë, të dhënat mbi numrin e anëtarëve dhe kapacitetet e tyre prodhuese tregojnë një realitet krejt tjetër.
Përfaqësimi real i sektorit bëhet nga Shoqata e Industrisë së Qumështit të Kosovës (ShIQK), e cila përfshin 15 fabrika të qumështit. Këto kompani së bashku grumbullojnë çdo ditë qindra mijëra litra qumësht nga fermerët kosovarë.
Kompania Ajka Sh.P.K., pronar i së cilës është Ramadan Memaj, sipas të dhënave të industrisë grumbullon rreth 1 mijë litra qumësht në ditë, sasi kjo që është shumë më e vogël krahasuar me fabrikat kryesore të përpunimit të qumështit në Kosovë. Vetëm fabrika Vita grumbullon rreth 100 mijë litra qumësht në ditë nga fermerët vendorë.
Memaj në kulmin e fushatës publike kundër përpunuesve të qumështit në vend priti në takim ministrin në detyrë të Bujqësisë, Armend Muja.
Por duket se edhe mbajtja e “zhagut” ndaj ministrit nuk e ka lënë kompaninë pa e përfshirë këto rezultate duke treguar se në produktet e saj u gjet vaj palme dhe yndyrë bimore e pa deklaruar.
Në faqen e saj në rrjete sociale Ajka Sh.P.K promovon produkte 100% të freskëta, vendore e natyrale por kjo del të jetë e pasaktë nga analizat e AUV, sipas të cilave produktet e kësaj kompanie kanë vaj palme.
Pas publikimit të raportit të analizave nga AUV, shoqata e udhëhequr nga Memaj ka bërë thirrje për ndalimin e vajit të palmës në fabrikat e përpunimit të qumështit, edhe pse kompania Ajka, në pronësi të tij, ndodhet në mesin e përdoruesve të kësaj yndyre bimore.
“Fshehja masive e vajit të palmës dhe qumështit pluhur në produktet e qumështit tregon se jemi duke u përballur me një problem jashtëzakonisht të madh, i cili mund dhe duhet të ndalet”, ka thënë shoqata e drejtuar nga Memaj, në një komunikatë për media.
