Sot kanë dalë pagat për të gjithë të punësuarit në sektorin publik, por Policia e Kosovës saktësisht ata që punojnë në veri të vendit nuk janë paguar njëjtë sikur muajt e kaluar.
Kjo pasi policët që shërbejnë në veri të vendit nuk janë paguar për orët shtesë, pasi për disa vite ishin paguar për shërbimin jashtë orarit të zakonshëm.
Kështu mëson Gazeta Online Veriu.info pasi dhjetra ankesa kanë ardhur në adresë të mediumit nga vet policët që shërbejnë në këtë pjesë të vendit të cilët thonë se nuk kanë marrë pagesë për orët shtesë gjatë muajit mars.
Pagesa për orë shtesë për policët që ofrojnë siguri në veri të vendit është një praktikë e viteve të fundit, pas veprimeve që ka ndërmarrë shtetit i Kosovës për shtrirje të plotë të autoritetit në këtë pjesë të vendit.
Kryeministri Albin Kurti dhe gjithë qeveria në mënyrë të vazhdueshme kanë lavdëruar policinë për punën e gjatë në orar që kanë bërë këtyre viteve të fundit, por duket se krejt kjo ka qenë për konsum politik, pasi në fund kanë vendosur të mos i paguajnë për orët shtesë anipse përveç lodhjes ata përballen edhe me rrezikshmëri të lartë në veri./Veriu.info/
