Në kuadër të një hulumtimi për parregullsitë në sektorin privat të shëndetësisë, Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin “Facial AM” është gjobitur me një (1) mijë euro për ushtrim të veprimtarisë pa licencë.
E njohur në publik si doktoresha e VIP-ave, Dr. Linda (Mirlinda Berisha) është përfshirë në një skandal të radhës, duke kryer shërbime shëndetësore pa licencë.
Në raportimin e inspektimit të siguruar nga Veriu.info thuhet se inspektorët shëndetësorë kanë realizuar këtë inspektim pas marrjes së një ankese, ku denoncohej ky subjekt për ofrim të shërbimeve shëndetësore pa licencë.
Sipas këtij raporti të hartuar më 28.04.2028, bëhet e ditur se “Facial AM”, me themeluese Mirlinda Berisha, e cila në publik njihet si Dr. Linda, është vërtetuar se ushtron veprimtari shëndetësore pa licencë.
Skandali i “Facial AM” të Dr. Linda nuk përfundon me kaq, pasi që inspektorët aty kanë gjetur edhe një fletore ku evidentoheshin pacientët e trajtuar në këtë klinikë pa licencë, ku ofroheshin shërbime shëndetësore në mënyrë të kundërligjshme fizioterapeutike.
Në njërën prej dhomave të “Facial AM” të Dr. Linda është gjetur edhe Metox (botox) i përdorur në shportën e mbeturinave, ani pse ky subjekt nuk kishte licencë për ushtrim të veprimtarisë.
Përveç botox-it janë gjetur edhe shiringa të mbushura me filler dhe disa deklarata të pacientëve mbi dhënien e pëlqimit për ndërhyrje estetiko-dermale.
Veprimet e kundërligjshme të Dr. Linda janë vërtetuar edhe përmes çmimores së “Facial AM”, ku inspektorët shëndetësorë kanë gjetur se figuronin shërbime shëndetësore fizioterapeutike, shërbime me botox dhe shërbimi me laser Fraxel.
Për shkak të të gjitha këtyre shkeljeve ligjore, si pasojë e ushtrimit të veprimtarisë pa licencë, Inspektorati Shëndetësor, me procesverbalin e datës 08.04.2025, kishte marrë vendim që “Facial AM” të mos ofrojë shërbime të palicencuara deri në licencim.
Veriu.info ka dërguar pyetje në “Facial AM” më 5 janar për këtë vendim dhe raport inspektimi, por deri në momentin e publikimit të artikullit nuk kemi marrë përgjigje.
Ky nuk është skandali i vetëm i Dr. Linda, pasi që në vitin 2021 mediat kishin raportuar se ajo për disa vite kishte kryer shërbime të fillerëve dhe botox-it në Prishtinë.
Veriu.info posedon dosjen e plotë me 40 faqe, por për shkaqe teknike më poshtë gjeni një pjesë: dokumentin e vendimit, raportin e inspektimit, procesverbalin dhe disa nga fotografitë e inspektimit në “Facial AM” të Dr. Linda.
