Kryetari i Komunës së Drenasit dhe kryeyari i degës së PDK-së në këtë qytet, Ramiz Lladrovci, sot i ka dërguar një letër kryetarit të PDK-së, Memli Krasniqi, të cilit i ka dërguar listën me emrat e propozimeve të kandidatëve për deputetë.
Veriu.info ka siguruar eksklizivisht mesazhin e dërguar nga Lladrovci për Krasniqin, ku kryetari i Drenasit e nisi me shprehje të respektit për lidershipin e liderit aktual të PDK-së.
Burime të Veriu.info thonë se lënia jashtë kësaj liste e deputetit Ferat Shala, Petrit Hajdarit, Fadil Demakut dhe Sejdi Hoxhës, është bërë për arsye se këto figura me peshë të madhe politike në Drenas nuk mund të kontrollohen nga Ramiz Lladrovci.
Lladrovci e vlerëson Krasniqin, për siç thotë, ruajtjen e qetësisë dhe dhënien e motivit shtesë për seriozitetin e gjendjes dhe domosdonë e fitores së PDK-së.
“Në mbledhjen e fundit të kryesisë së Degës tonë, më 24 shtator, në pikën të ndryshme, kam kërkuar nga të gjithë anëtarët e kryesisë dhe kryetarët e nëndegëve të jenë transparent në kërkesat e tyre. Aty kam deklaruar se nuk kam asnjë preferencë për asnjë nga kandidatët për deputet nga dega jonë, por, janë të lirë kushdo e konsideron se mund të fitojë mandat, të bëj propozime dhe i dërgoj te Kryetari, për shqyrtim”, thuhet në mesazhin e tij të siguruar nga Veriu.info.
Tutje, Lladrovci i shpjegon Krasniqit se në mbledhje, u ka thënë të pranishmëve se kushdo që e sheh se qytetari ka simpati për kandidaturën e tyre për Parlament dhe mund të jetë propozim serioz nga dega jonë, do ta përcjelli kandidaturën e tij personalisht.
Në fund të letrës Lladrovci kujdeset që lideri i PDK-së të mos ketë ndonjë hatërmbetje, duke i thënë se është në kompetencën tuaj ti shqyrtoni propozimet dhe shihni mundësinë e vendimit të duhur të përfaqësimit sa më të drejtë dhe sa më gjithëpërfshirës, duke mos më kyçur mua si pjesë as e propozimit e as të vendimmarrjes.
