Tashmë është bërë e njohur për publikun pakënaqësia e disa deputetëve të Lëvizjes Vetëvendosje me partinë e tyre.
Pakënaqësia është shprehur disa herë në të kaluarën, por kjo u vërejt seancën e fundit kur disa deputetë të partisë në pushtet ndërruan vendet e tyre dhe nuk morën pjesë në procesin e votimit.
Eman Rrahmani dhe Visar Korenica janë dy nga ta që tashmë publikisht kanë shprehur pakënaqësitë me partinë e tyre, sidomos për çështjen e Kodit Civil që lejon martesën mes gjinisë së njëjtë dhe çështjen e shamisë.
Por duket se pakënaqësitë do të marrin formë konkrete të angazhimit politik, pasi këta deputetë pritet të largohen nga Vetëvendosje.
Gazeta Online Veriu.info merr vesh nga burimet e saj se deputetët Eman Rrahmani dhe Visar Korenica do të largohen nga Vetëvendosje, dhe të martën do të prezantojnë lëvizjen politike “Lista për Familjen” së bashku me AKR-në e Behgjet Pacollit dhe PD-në e Ferid Aganit në oborrin e Kuvendit të Kosovës.
Sipas këtyre burimeve Listës për Familjen pritet t’i prijë në zgjedhjet e 9 shkurtit deputeti Eman Rrahmani, kurse do të pasohet nga Behgjet Pacolli dhe Ferid Agani.
Mësohet se Rrahmani dhe Korenica po negociojnë edhe me deputetë tjerë të pushtetit që t’i bashkohen kësaj liste.
Emërtimi i listës duket se flet edhe për orientimin e tyre konservator me qëllim ruajtjen e familjes dhe kundër Kodit Civil që lejon martesën e gjinisë së njëjtë, gjë që e kanë kundërshtuar ashpër deputetët Rrahmani dhe Korenica./Veriu.info/
