Veriu.info kishte raportuar ekskluzivisht para rreth dy javësh se si Inspektorati Shëndetësor kishte mbyllur përkohësisht klinikën për mbjelljen e flokëve “Care & Hair Fix”, pak ditë pasi që ajo ishte hapur me një ceremoni glamuroze në prezencën edhe të shumë personave VIP.
“Inspektorati Shëndetësor ka realizuar një inspektim në klinikën “Care & Hair Fix’ në Prishtinë dhe ka konstatuar se subjekti në fjalë nuk posedon licencën e nevojshme për të ushtruar veprimtarinë shëndetësore. Për këtë arsye, Inspektorati Shëndetësor ka marrë vendim për ndërprerjen e përkohshme të ushtrimit të veprimtarisë deri në licencimin e këtij institucioni. Gjithashtu, dëshirojmë t’ju informojmë se Inspektorati Shëndetësor ka konstatuar se në këtë klinikë kishte edhe staf të pa licencuar”, thuhej në përgjigjen e Ministrisë së Shëndetësisë për Veriu.info më datë 24 prill.
Veriu.info përmes kërkesës për qasje në dokumente publike, ka arritur të siguroj nga Ministria e Shëndetësisë vendimin për mbylljen e klinikës, raportin e inspektimit dhe procesverbalin e inspektimit, ku konstatohen shkelje ligjore nga klinika “Care & Hair Fix” me pronar Fehim Haliti, që në publik njihet edhe si stomatologu i VIP-ave.
Me vendimin e nënshkruar nga inspektorja e Inspektoratit Shëndetësor, “Care Hair Fix L.L.C.” është ndëshkuar me gjobë prej 2 mijë euro për shkelje të dispozitave të Ligjit për Shëndetësi dhe ishte mbyllur përkohësisht deri në licencim.
Në arsyetim të vendimit thuhet F.H. (v.j. Fehim Haliti) themelues i SPSH “Care Hair Fix L.L.C.”, ka bërë shkelje të dispozitave ligjore të Ligjit për Shëndetësi, pasi të gjitha institucionet shëndetësore mund të fillojnë punën vetëm pas licencimit nga Ministria ose organi i autorizuar prej saj.
“Gjatë inspektimit u konstatua se në këtë subjekt privat shëndetësor ishin duke u kryer shërbime shëndetësore në lëmin e Dermatologjisë pa poseduar licencë valide për ushtrim të veprimtarisë shëndetësore nga Divizioni për Licencim dhe Akreditim në Ministrinë e Shëndetësisë, ku në momentin e inspektimit nga “Care Hair Fix L.L.C.” në Prishtinë, nuk na është prezantuar licenca e institucionit”, thuhet në arsyeti, duke treguar se me datë 15 prill i është refuzuar licenca, datë në të cilën është aprovuar për shqyrtim.
Arsyetimi i vendimit tregon se në “Care Hair Fix L.L.C.” janë gjetur punëtorë që ofrojnë shërbime shëndetësore të anestezionit dhe infermierisë pa licencë. Po ashtu thuhet se në regjistrin për pacient “Care Hair Fix L.L.C.” nuk janë evidentuar pacientët të cilëve ju është ofruar shërbim shëndetësor dermatologjik pa poseduar licencë, gjë që realisht paraqet fshehje të trajtimit të pacientëve.
Si pasojë e këtyre të gjetur që janë në kundërshtim të plotë me Ligjin për Shëndetësi, Inspektorati Shëndetësor më datë 22 prill i kishte vendosur shenjat e ndërprerjes së përkohëshme të veprimtarisë, për të cilat Veriu.info më datë 24 prill kishte raportuar se janë mbuluar (fshehur) për publikun nga “Care Hair Fix L.L.C.”.
Në raportin e hartuar nga inspektorja shëndetësore, Dr. Albana Beqiri, janë evidentuar konstatimet e inspektimit, të cilat mund t’i shihni në dokumentin e mëposhtëm:
Me këtë raport inspektorja shëndetësore rekomandon:
- Ndalimin e ushtrimit të veprimtarisë për “Care Hair Fix L.L.C.” deri në licencim;
- Ndalimin e ofrimit të shërbimit shëndetësor për një punëtor deri në licencim’
- Ndalimin e ofrimit të shërbimit shëndetësor për dy punëtorë deri në lajmrim në DLA/MSh.
Më poshtë gjeni të gjitha shkresat e lëndës së inspektimit:
