Ekspertja e energjisë, Janina Ymeri, ka reaguar pas deklaratave të bëra mbrëmë në emisionin Pressing, duke ngritur një sërë shqetësimesh dhe pritjesh ndaj institucioneve dhe përfaqësuesve politikë.
Ymeri ka theksuar se pret me padurim konferencën për shtyp që, sipas saj, pritet të mbahet nga pushteti dhe të udhëhiqet nga deputeti i VV-së, Armend Muja, i cili paralajmëroi paraqitjen e disa të dhënave të reja.
Ajo ka nënvizuar se Muja duhet ta ketë të qartë se ekziston një hetim aktiv nga Prokuroria Speciale për çështjen e energjisë së importuar, duke shtuar se deklaratat e tij publike mund të bëhen pjesë e këtij procesi hetimor.
Në vijim, Ymeri ka shprehur shqetësimin për “defektin” në uebsajtin e Doganës së Kosovës, i cili prej dy ditësh ka pamundësuar qasjen në të dhënat e këmbimeve tregtare. Ajo ka shpresuar që kjo pengesë të jetë thjesht një problem teknik dhe jo pjesë e një skeme të mundshme për dezinformimin e të dhënave.
Megjithatë, ekspertja ka rikujtuar se posedon të dhëna të mëhershme nga Dogana e Kosovës, të cilat dëshmojnë se vendi ka importuar energji edhe nga Serbia në periudhën 2021–2025.
Ymeri ka theksuar gjithashtu se mbetet në dorën e Armend Mujës dhe eksponentëve të tjerë të VV-së që ta përkrahin deri në fund kryeministrin Albin Kurti, i cili, sipas saj, dyshohet se është bërë pre e ndikimeve dhe lajthitjeve të mafies energjetike, duke përmendur rastin e Martin Berishajt dhe pagesat e lidhura me Beogradin.
Ajo ka bërë të ditur se kompania EFT e biznesmenit serb Vuk Hamoviq po hetohet për përfitime të dyshuara në kurriz të Kosovës përmes rezervimit të kapaciteteve ndërkufitare, si dhe përmes marrëdhënies me kompaninë NOA, me të cilën ka lidhje familjare. Sipas saj, skema dyshohet të ketë funksionuar në dy mënyra: duke stërshitur kapacitete me çmime të larta deri në 798 euro për MWh dhe duke monopolizuar importin përmes partneritetit me NOA.
