Jesus Vallejo kaloi plot 10 vjet si pjesë e Real Madridit, një periudhë gjatë së cilës arriti të zhvillojë vetëm 34 ndeshje zyrtare me ekipin e parë. Gjatë kësaj kohe, mbrojtësi spanjoll u huazua në pesë skuadra të ndryshme, pa arritur kurrë të vendosë veten si pjesë e rëndësishme e ekipit madrilen dhe pa lënë gjurmë të qëndrueshme në “Santiago Bernabéu”.
Pas një karriere të mbushur me ulje-ngritje, Vallejo vendosi të ndryshojë rrjedhën e saj sezonin e kaluar, duke nënshkruar me Albaceten në LaLiga 2. Qëllimi i tij ishte i qartë: të rigjente formën, besimin dhe vazhdimësinë në lojë, shkruan Indeksonline
Ky vendim po shpërblehet. Vallejo ishte protagonist në Copa del Rey, duke shënuar gol ndaj Celta Vigos dhe duke ndihmuar Albaceten të kualifikohej në raundin e 1/16-ave të finales. Por momenti më emocional erdhi së fundmi, kur ai ishte pjesë e ekipit që siguroi kualifikimin në çerekfinale dhe njëkohësisht realizoi eliminimin historik të Real Madridit, ish-klubit të tij.
Pamjet pas ndeshjes treguan qartë peshën emocionale të këtij suksesi për Vallejon, i cili nuk arriti t’i mbajë lotët.
