Drejtori i përgjithshëm i mediumit “Albanian Post”, Baton Haxhiu, ka dhënë informacionet e para lidhur me Exit Poll-in, i cili do të publikohet në AP në bashkëpunim me Institutin “Source”, në orën 19:00.
Haxhiu gjatë një paraqitjeje televizive në mediumin “T7”, ka deklaruar se në Prishtinë po zhvillohet një garë e ashpër.
“Prishtina është e jashtëzakonshme si garë, e jashtëzakonshme si betejë në çdo gjysmë ore të votimit, dhe rezultati nuk dihet deri në momentin e fundit”, deklaroi Haxhiu.
Ai ka sqaruar edhe rezultatet aktuale në disa komuna të tjera.
“Dy komuna shkojnë pa balotazh tashmë dihet, sepse ka një diferencë të mjaftueshme që Exit Poll-i e përcakton. Kurse tri të tjera janë shumë afër; njëra prej tyre ka diferencë prej vetëm 1.4–1.5 për qind dhe është shumë pranë që të shkojë pa balotazh. Dy të tjera dihet që tashmë kanë shkuar”.
“Kurse në tri të tjera, rezultati është 49.2%, në të tjerat 48.8%, e në një tjetër 47.8%. Këto tri komuna, deri në momentin e fundit, nuk dihet nëse do të ketë balotazh apo jo”.
Rezultatet e para, menjëherë pasi të mbyllen vendvotimet, do të publikohen në Albanian Post në ora 19:00 në uebfaqen e AP-së dhe në të gjitha kanalet zytare si dhe në televizionin T7.
Qytetarët e Republikës së Kosovës janë duke ushtruar të dielën të drejtën kushtetuese të votës. Këto janë zgjedhjet e rregullta lokale, të cilat mbahen në 38 komuna të Kosovës.
Numri i qytetarëve me të drejtë vote në vendvotime, sipas të dhënave të KQZ-së është 2 milionë e 69 mijë e 98 votues. Prej tyre, nga jashtë Kosovës janë regjistruar për votim 43 mijë e 993 qytetarë me të drejtë vote.
Votimi përmes postës ka nisur më 17 shtator dhe ka përfunduar dje, më 11 tetor.
Numri i subjekteve politike të certifikuara për pjesëmarrje në këto zgjedhje është 93, prej të cilave: 32 parti politike, 2 koalicione, 32 iniciativa qytetare dhe 27 kandidatë të pavarur.
