Një valë e re akuzash mbi integritetin e tenderëve publikë ka goditur Ministrinë e Shëndetësisë (MSH), institucion i drejtuar nga Ministri në detyrë Arben Vitia, duke vënë në shënjestër drejtpërdrejt Divizionin e Prokurimit, ku shef është Berat Marmullaku. Falsifikim dokumentesh e manipulim me çmime dhe jo vetëm. Janë disa prej akuzave që janë deponuar në një ankesë që tashmë është publike
Tenderi për “Servisimin e automjeteve te MSH”-së ri-nisi zyrtarisht më 6 Tetor 2025, kur MSH lëshoi Njoftimin për Kontratë dhe planifikonte të shpenzonte 90 mijë euro.
Fakti kyç i dokumentacionit është se kjo ishte një procedurë e kategorizuar si Ritender – që nënkupton se procedura e mëparshme për të njëjtin shërbim kishte dështuar ose ishte anuluar.
Ky detaj, sipas pretendimeve të ankuesit, i vendoste Divizionit të Prokurimit të MSH-së, që shef e ka Berat Marmullakun detyrimin ligjor dhe moral për të ushtruar një kujdes të shtuar në vlerësimin e ofertave të reja. MSH, e cila kishte parë një dështim të mëparshëm, duhej të garantonte një proces transparent dhe të rreptë, në mënyrë që të shmangte çdo parregullsi.
Falsifikim dokumentesh e manipulim me çmime dhe jo vetëm. Janë disa prej akuzave që janë deponuar në një ankesë që tashmë është publike
Këto akuza janë përmendur në kërkesën për rishqyrtim të cilën ankuesi Auto Europa Cars sh.p.k. & N.T.SH. EUROPA e ka paraqitur me dëshmi, duke pretenduar se MSH ka shpërblyer me kontratë një kompani, dosja e të cilit dëshmon falsifikim të qëllimshëm dhe mashtrim.
Megjithatë, pikërisht në këtë Ritender, MSH shpalli fitues Operatorin Ekonomik Gani B. Krasniqi B.I. me një ofertë prej 60,771.17 €, duke i dhënë dritën jeshile kontratës duke u justifikua me standardin “çmimit më të ulët në mesin e tenderëve që plotësonin kërkesat e dhëna”.
Kjo deklaratë zyrtare e MSH-së është pika fillestare e akuzës: si mund të konsiderohet i përgjegjshëm një operator, dosja e të cilit, siç pretendon ankuesi, është e mbushur me falsifikime dhe kontradikta administrative?
Ankesa detajon prova që, sipas saj, janë të mjaftueshme për diskualifikim dhe përfundojnë në vepër penale: Akuza për vjedhje identiteti dhe nënshkrime të kopjuara.
Ankuesi thekson se operatori fitues ka falsifikuar parakontratën e inxhinierit të elektroteknikës, Bujar Gjocaj, i cili e ka mohuar këtë me shkrim. Më tej, ankuesi dokumenton se nënshkrimi i inxhinierit në dosjen e MSH-së është një kopje perfekte (copy-paste) nga një dokument i mëparshëm i dorëzuar në një tjetër Ministri.
“Ne i kemi dërguar më 05.11.2025 e-mail z. Bujar Gjocaj i cili është Drejtor i Gjimnazit “Gjin Gazuli “ në Prishtinë se a është në dijeni se OE Gani Krasniqi B.I. ka dorzuar parakontratë me ju në Ministrin e Shëndetësisë për aktivitetin e prokurimit me titull: “Servisimi i automjeteve te MSH-se RITENDER”, thuhet në dokument dhe tutje citohet Gjocaj të u ketë thënë se “Unë nuk kam ndonjë parakontratë me askënd për këtë tender dhe ajo kopje nuk është nga unë vetëm nëse është ndonjë parakotratë tjetër për te cilën unë nuk jam ne dijeni”.
Kërkesa vë në pah se parakontrata me Inxhinierin e Makinerisë mbante datën 20 Shtator 2025, ndërkohë që Njoftimi i MSH-së u lëshua vetëm më 6 Tetor 2025. Ankuesi ngre pyetjen se si Komisioni Vlerësues nuk e vërejti që numri specifik i tenderit u citua në një dokument të datës së hershme, duke sugjeruar fabrikim ose informacion të brendshëm.
“Shtrohet Pyetja si si OE Gani Krasniqi B.I. ka mundur të dij numrin e prokuirmit të këtij aktiviteti të prokurimit ende pa u publikuar. Vlerësoj dhe konsiderojm që sërish këtu kemi të bëjmë me mashtrim me prokurim publik. Kërkojmë nga AK-ja që në këto 2 pretendime ankimore të aprovohen si të bazuara dhe që AK-ja të veproj konform nenit 99.2 të LPP-së dhe nenit 67.9 të Rregullores Për Prokurimi Publik nr.002/2024 për diskualifikim nga pjesëmarrja në prokurim publik pasi OE i rekomanduar për kontratë ka paraqitur dokument të rrejshëm”, thuhet në ankesë.
Ankuesi dokumenton se operatori ka ofruar çmime absurde për pjesë luksi (si amortizeri i BMW-së me 198 € kur kostoja reale është 1,423 €). Sipas ankuesit, pranimi i këtyre çmimeve pa kërkuar justifikim shkel Nenin 61 të LPP-së dhe komprometon seriozisht cilësinë e shërbimit dhe sigurinë e automjeteve shtetërore.
Pavarësisht krejt këtyre akuzave e dokumenteve, Ministria e Arban Vitisë ka nxjerr dokumentin që konstaton se duhet të i jepet kontrata firmës Gani B. Krasniqi B.I.. me emrin kompercial D.P.Z. “Suzuki” me kontratë mbi 60 mijë euro. /Insajderi.org
