Me heqjen e vizave, kosovarët kanë nisur të lëvizin më shpesh në Zonën Schengen.
Po të ishin aviobiletat më të lira, nga kryeqyteti i tyre, mbase do të udhëtonin edhe më shumë, raporton Klan Kosova.
Krahasuar me atë të Tiranës e Shkupit, fluturimi nga aeroporti i Prishtinës është dukshëm më i shtrenjtë, në destinacione evropiane dhe jo vetëm.
Lëvizjet më të shpeshta të kosovarëve janë për në Gjermani, Zvicër e Austri, ku ka me shumë mërgatë.
Një biletë e nxjerrë brenda ditës, të martën e 4 shkurtit, për në Vjenë ishte 242 euro.
Fluturimi nga Tirana për në kryeqytetin austriak doli përgjysmë më lirë.
Një familjeje katër anëtarëshe kosovare për të udhëtuar drejt Romës i duhet t’i ndaj mbi 900 euro për biletat, nëse fluturon nga aeroporti “Adem Jashari” më 15 shkurt. Nga Tirana, fluturimi kthyes, në të njëjtën datë, nuk hip mbi 240 euro.
Kosovarët paguajnë rrastë kur nisen për në qytetet gjermane si Memmingeni e Shtutgarti.
Afër 200 euro shkon një biletë e vetme drejt këtyre destinacioneve nga Prishtina më 5 ose 20 shkurt.
Dukshëm më të lirë kushtojnë nisje-ardhjet, nga Shkupi 186 euro dhe Tirana 62 sish.
Të shtrenjta helm janë udhëtimet në destinacionet e mëdha turistike si Parisi apo Barcelona.
Bileta nga Prishtina drejt qytetit katalanas, më 17 shkurt kushton 205 euro për person, ndërkaq në Tiranë gjenden edhe me 83 euro.
E nëse nga kryeqyteti shqiptar drejt atij francez duhen paguar 156 euro ,më 10 shkurt prej Prishtinës në Paris shpenzohen tri herë më shumë para, në një biletë individuale.
Arsye pse fluturimet nga Prishtina janë më të shtrenjta se ato nga Tirana, e shpesh edhe nga Shkupi, ka të bëjë me taksat më të larta dhe monopolit për kerozinë (ndoshta edhe avoikompani) që imponohen në aeroportin Adem Jashari, si pasojë e politikave joprofesionale të autoriteteve qeveritare në Republikën e Kosovës.
