Në mesin e 28 kompanive që Agjencia e Ushqimit dhe Veterinarisë u kishte pezulluar lejet për importimin e kafshëve të gjalla për therje në Kosovë, është edhe kompania “Fron” Sh.P.K. me pronar Mustafë Halili.
Veriu.info ka siguruar vendimin e nënshkruar nga drejtori ekzekutiv i AUV, Bekim Hoxha, përmes të cilit i është pezulluar leja e importit kompanisë “Fron” Sh.P.K. për importimin e kafshëve të gjalla në Kosovë.
Në arsyetimin e këtij vendimi të nxjerrë me 10 prill 2025, thuhet se Inspektorati i Veterinarisë më datë 4 prill ka gjetur se “Fron” Sh.P.K. me adresë në Prishtinë për periudhën tetor 2024 deri mars 2025 ka importuar 920 krerë gjedhe, të cilat duhet të thereshin brenda afatit prej 72 orëve në thertore të licencuar.
Mirëpo, sipas raportit të inspektorëve, “Fron” Sh.P.K. në sistemin FCMS ka të raportuara vetëm 109 gedhe të therura, ku 690 prej tyre nuk i ka raportuar, ndërsa 121 sosh i ka rieksportuar.
Pra, siç ceket në vendimin e drejtorit të AUV për pezullimin e lejes për “Fron” Sh.P.K., por edhe siç e parasheh legjislacioni në fuqi, me rastin e importimit të kafshëve për therje në Kosovë, operatori ekonomik e ka për obligim që ato t’i dërgoj drejtpërsëdrejti në thertore të licencuar, ku therja e tyre duhet të bëhet brenda 72 orësh.
Veriu.info ka siguruar ankesën e bërë nga “Fron” Sh.P.K. në AUV ndaj vendimit për pezullim të lejes së importit, ku vet kjo kompani e pranon që kafshët e importuara ua ka shitur biznesve (personave juridik) dhe qytetarëve (bizneseve), veprim që është rreptësisht i ndaluar, pasi që ato së pari duhet të theren e vetëm pastaj mund të shitet mishi i tyre, por jo edhe kafsha e gjallë.
Ajo që është e çuditshme te ankesa, e-mail adresa nën nënshkrim është e një personi të quajtur Fadil Halili, përderisa ankesa është nënshkruar me inicialet e pronarit të “Fron” Sh.P.K., Mustafë Halili. Po ashtu edhe numri i telefonit është i personit me emrin Fadil Halili.
Foto: Fadil Halili
Përkundër që “Fron” Sh.P.K. pranon se kafshët nuk i ka therur, por ato ua ka shitur qytetarëve dhe bizneseve, me një raport skandaloz Komisioni i Ankesave rekomandon kthimin e licencës së importit të kafshëve të galla për këtë kompani.
