Liderët në mbarë botën po reagojnë ndaj shpalljes së Presidentit të SHBA-së, Donald Trump, për vendosjen e tarifave ndaj pothuajse çdo vendi.
CNN ka publikuar reagimet më të fundit nga disa vende:
Gjermania: Kancelari në largim i Gjermanisë, Olaf Scholz, tha se tarifat janë “fundamentalisht të gabuara” dhe do të shkaktojnë dëm në mbarë botën, përfshirë edhe vetë Amerikën. “Ne duam bashkëpunim, jo konfrontim, dhe do t’i mbrojmë interesat tona”, tha ai.
Mbretëria e Bashkuar: Keir Starmer tha se Britania do t’u përgjigjet tarifave me “gjakftohtësi dhe qetësi”, por kryeministri britanik shtoi se “qartësisht, do të ketë një ndikim ekonomik”. Starmer u tha biznesmenëve në Downing Street se Trump “veproi për vendin e tij, dhe ky është mandati i tij. Sot, unë do të veproj në interes të Britanisë”.
Franca: Qeveria franceze sulmoi “qëndrimin imperialist” të Donald Trump, të cilin një zëdhënës e akuzoi se dëshiron të jetë “mjeshtër i botës”, në një sulm të rrallë personal të enjten ndaj presidentit amerikan pas shpalljes së tarifave globale.
Belgjika: “Duke luajtur me shkrepëse, Shtetet e Bashkuara do të përfundojnë duke u djegur”, tha Zëvendëskryeministri belg, Maxime Prévot. Ai shtoi se është “për të ardhur keq” që SHBA “ka vendosur të sulmojë në mënyrë të njëanshme rendin tregtar global duke vendosur tarifa për të gjithë dhe veçanërisht për partnerët e saj”.
Italia: Kryeministrja Giorgia Meloni anuloi agjendën e saj për të enjten për t’u fokusuar te pasojat e tarifave ndëshkuese.
Norvegjia: Tarifimi i aleatëve dhe kundërshtarëve të Amerikës mund ta shkelë një nen të traktatit të NATO-s, i cili u kërkon vendeve anëtare të aleancës ta promovojnë stabilitetin ekonomik dhe bashkëpunimin, tha ministri i jashtëm i Norvegjisë të enjten. Espen Barth Eide u tha gazetarëve në selinë e NATO-s në Bruksel se aleatët do të bënin mirë ta kujtonin këtë “pjesë të rëndësishme të traktatit”.
Afrika e Jugut: Qeveria e Afrikës së Jugut i cilësoi tarifat e vendosura nga Trump si “ndëshkuese”, por tha se dëshiron të negociojë urgjentisht një marrëveshje të re tregtare. “Tarifat theksojnë urgjencën për të negociuar një marrëveshje të re dypalëshe dhe reciprokisht të dobishme tregtare me SHBA-në, si një hap thelbësor për të siguruar stabilitet tregtar afatgjatë”, thuhet në një deklaratë të qeverisë afrikano-jugore.
