Gennaro Gattuso ka ndarë emocionet e tij pas emërimit si trajner i ri i Kombëtares së Italisë, duke e quajtur këtë detyrë një ëndërr të realizuar.
47-vjeçari mori drejtimin e “Azurrëve” pak ditë më parë, pas vendimit të Federatës Italiane të Futbollit (FIGC) për të shkarkuar Luciano Spallettin.
Gjatë prezantimit të tij, Gattuso shprehu entuziazmin dhe vendosmërinë për sfidën e re që e pret në krye të kombëtares.
“Kjo është një ëndërr e bërë realitet. Është një sfidë e vështirë, por asgjë në jetë nuk është e lehtë. Nuk ka shumë për të thënë – thjesht duhet të punojmë”, deklaroi ai.
I pyetur për gjendjen e ekipit kombëtar dhe mungesën e rezultateve në vitet e fundit, Gattuso theksoi nevojën për t’u rikthyer tek mentaliteti fitues.
“Për vite me radhë njerëzit kanë thënë se nuk kemi lojtarët e duhur. Unë besoj se thjesht duhet t’u futemi në mendje dhe t’i shtyjmë të japin maksimumin. Qëllimi im është ta sjell Italinë përsëri në Kupën e Botës – kjo është thelbësore për ne”.
Sipas tij, përtej sistemit dhe taktikave, kombëtarja italiane ka nevojë për frymë bashkimi dhe energji të reja.
“Ekipi kombëtar ka nevojë për entuziazëm, një ndjenjë uniteti dhe aftësinë për të qëndruar së bashku në kohë të vështira”, tha ai.
“Qëllimi im është të sjell gëzim, të ndërtoj një familje. Sistemet dhe taktikat vijnë më pas. Ne duhet të rivendosim mentalitetin që na përcaktoi për kaq shumë vite”, përfundoi trajneri i ri i Italisë.
