‘‘Presim që SHBA-të të marrin rolin udhëheqës për të gjetur zgjidhje për problemin e Kosovës’’. Kështu kishte deklaruar mes tjerash, në mars të vitit 1998, Bujar Bukoshi, ish-kryeministri i Kosovës në ekzil, pak para se të udhëtonte për në Shtetet e Bashkuara të Amerikës.
Bukoshi i cili ndërroi jetë sot pas një sëmundje të rëndë, kishte bërë të ditur se në vizitën e tij për në SHBA do të takonte kongresmenë e senatorë, dhe se kishte theksuar se ‘‘gjithmonë’’ do të kërkonte ndihmë nga SHBA-të.
‘‘Sot do të fluturojmë për në Uashington për t’u takuar me zyrtarë të Departamentit të Shtetit, disa kongresmenë dhe disa senatorë. Ne përpiqemi gjithmonë të kërkojmë ndihmë nga SHBA-të dhe presim që SHBA-të të marrin rolin udhëheqës për të zgjidhur dhe gjetur zgjidhje për problemin e Kosovës’’, kishe thënë ai.
I pyetur se pse kërkon ndihmë nga SHBA-të, ish-kryeministri, kishte thënë se SHBA-të si ‘‘superfuqia e vetme’’, kishte në dëshmuar në rastin e Bosnjës se mund të ‘‘ndalojë gjërat’’ në mënyrë efektive dhe të shpjet.
‘‘Sepse SHBA-të treguan se në tragjedinë e Bosnjës, si e vetmja superfuqi është në gjendje të ndalojë gjërat urgjente, ta bëjë këtë shumë efektivisht dhe shpejt, dhe pas kësaj mund të bëjmë filozofi, politikë, diplomaci e kështu me radhë’’, ishte përgjigjur ai.
Më tej, Bukoshi kishte theksuar nevojën që të kishte trupa në Kosovë për të mbrojtur popullsinë shqiptare nga ‘‘regjimi fashist kriminal i Beogradit’’.
‘‘Ne kemi nevojë urgjente për trupa në Kosovë, për të mbrojtur popullsinë e pambrojtur shqiptare nga regjimi fashist kriminal i Beogradit, është padyshim, dhe ne kemi nevojë për këtë lloj ndihme’’, ishte shprehur ai.
Ndryshe, Bukoshi ka ndërruar jetë sot në moshën 78-vjeçare, pas një beteje të gjatë me një sëmundje të rëndë. Ai ishte një nga figurat më të njohura të skenës politike dhe shëndetësore të Kosovës.
