Ka më shumë konfuzion rreth armëpushimit tashmë të brishtë, me Iranin që e akuzon Izraelin për shkelje të tij duke nisur një sulm masiv ndaj Libanit. Por Izraeli dhe SHBA këmbëngulin se Libani nuk është pjesë e marrëveshjes së armëpushimit me Iranin.
CNN sjell zhvillimet e fundit:
Sulmet e Izraelit ndaj Libanit: Izraeli të mërkurën nisi sulmet e tij më të mëdha ndaj Libanit që nga fillimi i luftës. Autoritetet libaneze thonë se sulmet kanë vrarë të paktën 182 persona dhe kanë plagosur edhe 890 të tjerë. Izraeli tha se sulmet kishin në shënjestër grupin Hezbollah të mbështetur nga Irani, ndërsa kryeministri i Libanit tha se u goditën civilë të paarmatosur. Irani pretendon se kjo ishte një shkelje e armëpushimit. Pakistani, i cili ndërmjetësoi bisedimet dhe ia paraqiti presidentit amerikan Donald Trump propozimin për armëpushim dyjavor, ka thënë se Libani është i përfshirë në armëpushim. Por Izraeli dhe SHBA thonë të kundërtën.
Ngushtica e Hormuzit: Trupat e Gardës Revolucionare Islamike të Iranit (IRGC) pretenduan të enjten se transporti detar në këtë rrugë ujore kritike u ngadalësua ndjeshëm dhe më pas u ndal, pas bombardimeve izraelite në Liban. Të dhënat e gjurmimit detar treguan se asnjë anije nuk po kalonte nëpër ngushticë herët të enjten, pas një raporti të mëparshëm se trafiku kishte filluar të lëvizte pasi armëpushimi hyri në fuqi. Zëvendëspresidenti i SHBA JD Vance përsëriti se nëse Irani nuk u përmbahet premtimeve për ta rihapur ngushticën, armëpushimi do të përfundojë.
Kushtet e armëpushimit: Duke shtuar konfuzionin mbi kushtet e marrëveshjes, Vance tha se kanë ekzistuar tre propozime të ndryshme me 10 pika. Është propozimi fillestar i Iranit, të cilin negociatorët amerikanë e refuzuan menjëherë; një draft i dytë, të cilin Trump e pranoi; dhe një version i tretë “maksimalist” që qarkullon në rrjetet sociale, tha ai.
Komentet e Trump: Të gjitha anijet, avionët, armët dhe personeli ushtarak amerikan do të mbeten “në vend, brenda dhe rreth Iranit” derisa të arrihet një marrëveshje e plotë, tha Trump në një postim në Truth Social vonë të mërkurën. Irani nuk duhet të ketë “ASNJË ARMË BËRTHAMORE dhe Ngushtica e Hormuzit DO TË JETË E HAPUR & E SIGURT”, shtoi Trump.
Bisedimet në Pakistan: Vance, i dërguari special Steve Witkoff dhe Jared Kushner do të shkojnë në Islamabad, Pakistan, për negociata me Iranin duke filluar nga e shtuna. Megjithatë, kryetari i parlamentit të Iranit pretendoi se pjesë të propozimit të Iranit janë shkelur para se bisedimet të fillonin.
