sh-presidenti i FC Prishtinës, Remzi Ejupi e “goditi” mbrëmë udhëheqësinë e Federatës së Futbollit të Kosovës, më saktësisht kryetarin aktual të saj, Agim Ademi.
I ftuar në emisionin sportiv “Favorit” në T7, Ejupi e përmendi një rast, që sipas tij, kreu i FFK-së, e ka uzurpuar një pjesë të parcelës që ia kishte ndarë Qeveria klubit të futbollit Prishtina për ta ndërtuar kompleksin sportiv në Bërnicë. Ejupi insiston se Federata po bën keqpërdorime të mjeteve, shkruan “Gazeta Express”.
“Këtu nuk është qëllimi për ta zhvilluar futbollin. Qëllimi është se qysh me e mbajt atë pozicion për vete. Futbollit të Kosovës i vidhet e drejta, i janë vjedh të gjitha financat. Mbahet një grup me një tjetër për t’i mbajtur pozitat e veta për të qëndruar sa më gjatë. Kurse, futbolli është duke shkuar thellë e më thellë në humnerë”, deklaroi fillimisht Ejupi.
“Nëse e shihni këtu, na kanë premtuar atëherë, jo UEFA, jo FIFA, jo do të bëhet në Obiliq, kaq milionë, por kurrë nuk u nis asgjë. E morëm ne një parcelë duke iu falënderuar si qytet i kryeqytetit ish-kryeministrit Ramush Haradinaj, i cili vërtetë na ndajti këtë tokë. Nuk ka vend ku s’kemi shkuar për ta kërkuar vetëm një hektar vend për ta bërë këtë fushë”, vazhdoi ai.
“Dhe çka ndodh këtu? Mu këtu, ku na kanë ndarë fushën, kryetari i Federatës vjen dhe na uzurpon tokën dhe atje bën fushë. Ka bërë fushë pa leje dhe pa asgjë. Megjithatë, ai një ditë nuk do të jetë më kryetar dhe fusha do t’i mbetet prapë futbollit, do t’i ngelet kryeqytetit”, nënvizoi Ejupi.
“Përveç se ta ka uzurpuar atë vend, pasi si duket është mësuar me uzurpime, si duket edhe nga Komuna ka pasur mbështetje. Ky (Agim Ademi) i ka bërë 2-3 fusha në atë vend, pa kokërr leje. Ai ka ta uzurpuar gjysmën e Taukbahçes. Gjysma e Taukbahçes është e uzurpuar dhe çdo vit vjen duke u betonuar atje. Atje në Komunë flejnë më duket, askush s’merret me të. Natyrisht, kur njeriu mësohet duke uzurpuar, vazhdon të uzurpojë pasi mendon se s’ka problem”, tha tutje ai.
“Ai (Ademi) pretendon se ka hise në atë tokë, ndërsa me para të Federatës i ka bërë 2-3 fusha në tokë të huaj për arsye se është mësuar me uzurpime”, përfundoi Ejupi. /Gazeta Express/
