Sezoni aktual po rezulton i jashtëzakonshëm për Vedat Muriqi, i cili po shkëlqen me fanellën e RCD Mallorca në elitën e futbollit spanjoll.
Sulmuesi kosovar është aktualisht golashënuesi i dytë më i mirë në La Liga, me 18 gola të realizuar deri më tani. Para tij renditet vetëm Kylian Mbappé, i cili kryeson listën me 23 gola.
I njohur me nofkën “Pirati”, Muriqi është shumë pranë të shkruajë historinë me klubin spanjoll. Ai ka arritur në kuotën e 52 golave me Mallorcan dhe tashmë është vetëm dy gola larg barazimit të rekordit të legjendës Samuel Eto’o, si dhe tre gola larg thyerjes së tij.
Në prag të përballjes së radhës ndaj Elche, 31-vjeçari ka dhënë sinjale të qarta për ambiciet e tij, duke paralajmëruar se synon të hyjë në histori si golashënuesi më i mirë i të gjitha kohërave te Mallorca.
Forma e tij mbresëlënëse dhe vendosmëria për të thyer rekorde po e kthejnë këtë sezon në një nga më të mirët në karrierën e tij.
