Pep Guardiola e ka pranuar më sportivitet humbjen befasuese të Manchester Cityt të tij nga Al Hilali me rezultat 3:4 në të tetën e finales së Botërorit të Klubeve.
Trajneri spanjoll e ka lavdëruar kundërshtarin dhe e ka shpjeguar zgjedhjen e bërë, posaçërisht zëvendësimi i Erling Haalandit në vazhdime, kur skuadra ishte në kërkim të golit:
“Ishte mjaft i lodhur, ishte ai që e kërkoi zëvendësimin”, deklaroi ish-trajneri i Barcelonës e Bayern Munichut.
Ai pati fjalë të mira për kundërshtarin e udhëhequr nga Simone Inzaghi.
“Në këtë nivel, çdo ndeshje është e vështirë. Kemi pësuar shumë tranzicione, por kemi krijuar po ashtu shumë raste. Në përgjithësi, skuadra bëri mirë. Është mëkat, ishim në një moment të shkëlqyer. Nuk më mbetet tjetër pos t’i falënderoj të gjithë se si ushtrojnë, se si përgatiten. Dhanë gjithçka nga vetja”, shtoi Pep.
Trajneri spanjoll më pas i evidentoi disa aspekte pozitive përkundër eliminimit.
“Kam parë gjëra të mira, të cilat s’i kisha vërejtur më parë, mbi të gjitha në raportin mes lojtarëve dhe të stafit. Grupi ishte i lumtur, ushtrimet ishin të shkëlqyeshme. Por, niveli i Botërorit të Klubeve është i lartë”, nënvizoi ai.
Në fund, ai foli për të ardhmen. “E kam ndjenjën se skuadra është mirë, tash do të kthehemi në shtëpi. Është momenti për të pushuar, për ta rimbushur mendjen dhe për t’u përgatitur për sezonin e ardhshëm”, përfundoi Guardiola.
