Guvernatori i Bankës Qendrore të Republikës së Kosovës (BQK) Ahmet Ismaili, priti në takim zyrtar Guvernatorin e Bankës së Shqipërisë (BSH) Gent Sejko.
Guvernatori Sejko vizitoi BQK-në, ku e uroi edhe personalisht për detyrën Guvernatorin Ismaili dhe i ofroi bashkëpunim dhe mbështetjen e tij.
Guvernatori Ismaili e falënderoi Guvernatorin Sejko për bashkëpunimin e deritashëm të ofruar nga Banka e Shqipërisë për Bankën Qendrore të Republikës së Kosovës.
Në takim gjithashtu u diskutua lidhur me mundësitë e bashkëpunimit të mëtejmë të BQK-së dhe BSH-së në sektorin financiar, duke përfshirë aktivitete të përbashkëta në edukimin financiar dhe bashkëpunimit regjional.
Tutje, në këtë takim u konkludua se bashkëpunimi ndërmjet Bankës Qendrore të Republikës së Kosovës dhe Bankës së Shqipërisë do të zgjerohet edhe më tutje, me qëllim të krijimit të praktikave më të mira ndërmjet dy vendeve me përfitime për sisteme financiare dhe ekonomitë e dy vendeve.
