Dy takime gjatë dimrit, asnjë në pranverë dhe i pari për këtë verë.
Kështu i llogariti takimet me kryetarin e PDK’së, Bedri Hamza, kryetari i partisë fituese, Albin Kurti i Lëvizjes Vetëvendosje.
Ky i fundit tha se me Hamzën sot nisi një seri takimesh konsultative me partitë tjera për formimin e institucioneve pas tri palë zgjedhjeve në më pak se një viti e gjysmë. Më vonë pasdite, Kurti e paralajmëroi takimin me kreun e LDK’së, Lumir Abdixhiku.
S’e kishte fort zakon të ndalej para gazetarëve gjatë kësaj periudhe të fundit mospajtimesh me opozitarët, por kësaj radhe Kurti, përveçse u ndal për të ndarë informata mbi takimin që pati me Hamzën, foli edhe më një frymë “optimizmi për konstruktivitet” mes tyre.
Megjithatë, lideri i Vetëvendosjes tha se takimi me liderin e PDK’së s’prodhoi diçka konkrete.
“Me kryetarin Hamza u takuam së pari në këtë raund të këtyre takimeve meqenëse është edhe subjekti i dytë me numër të deputetëve pas Lëvizjes Vetëvendosje si fituese. E falënderoj kryetarin Hamza për këtë takim, i cili ishte takimi i parë dhe konstruktiv që kaloi në atmosferë të vullnetit të interesimit për t’i dhënë institucione të reja Republikës së Kosovës në përputhje me vullnetin e popullit. Aktualisht s’mund të them se kemi ndonjë rezultat konkret, ndonjë të arritur, që do të mund ta ndaja me publikun”.
Në anën tjetër, Hamza, i cili doli i pari nga takimi, tregoi se pozicioni i partisë së tij ishte i qartë: mbetet në opozitë.
“Bazuar në bisedat që kemi pasë dhe diskutimet që kemi pasë, normalisht korrekte, qëndrimi ynë është që PDK për këtë mandat është parti në opozitë dhe ne i dëshirojmë sukses zotit Kurti dhe të gjithë atyre që takohen, bisedojnë, që t’i japin vendit institucione, duke i përfshirë të gjitha institucionet”, tha Hamza për gazetarët.
Kurti kërkoi që “kjo frymë të mbizotërojë edhe në vijim dhe në përputhje me afatet kushtetuese t’i konstituojmë institucionet”.
“Vullneti është aty, atmosfera konstruktive duhet të vijojë të mbizotërojë. Duhet të jemi optimistë”.
Derisa zgjedhjet e qershorit u shkaktuan nga mungesa e konsensusit për Presidentin, Kurti u shpreh me bindje se këtë herë formimi i Qeverisë nga kjo legjislaturë nuk do ta çojë vendin më në zgjedhje. Duke qenë se i ka numrat e nevojshëm, bashkë me disa deputetë nga pakicat joserbe, Kurti tha se merr përgjegjësinë e plotë për formimin e këtij institucioni.
“Edhe partitë e pakicave që kanë qenë në të kaluarën bashkë me Lëvizjen Vetëvendosje në qeverisje, ne s’kemi asnjë arsye për të besuar se nuk do të jetë sërish njësoj. Kështu që jo vetëm që kemi 53 deputetë si Lëvizje Vetëvendosje, por njëkohësisht i kemi shumicën e deputetëve në Kuvendin e Republikës, madje kemi më shumë se edhe 61, që është minimumi i nevojshëm”.
Por, për vota të Presidentit, Kurti ia shtini lapsin llogaritjeve, duke përfshirë edhe ato të PDK’së dhe LDK’së, duke mos i numëruar 7 të AAK’së meqenëse lideri i kësaj partie, Ardian Gjini, nuk shkoi për takim. Por, AAK ka ofruar votat e saj në këmbim të përmbushjes së disa kërkesave, të cilat Gjini i ka përshkruar si në interes të vendit dhe asgjë për AAK’në.
“Si tri subjekte të mëdha, që së bashku kanë…le t’i mbledhim me shpejtësi 93 deputetë, pra 53 VV, 22 PDK dhe 18 LDK. Ne kemi numrin e mjaftueshëm të deputetëve që të konstituojmë të gjitha institucionet e legjislaturës së 11’të”.
Më pas Kurti ia largoi barrën e zgjidhjes si e vetme të bllokadës për Presidentin partisë së tij.
“Nëse unë si fitues i zgjedhjeve, si kryetar i Vetëvendosjes, kam përgjegjësinë për formimin e Qeverisë, zgjedhja e presidentit nuk është përgjegjësi vetëm e partisë fituese. Zgjedhja e presidentit është menduar që të ndodhë me një bashkëpunim me të tjerët. Andaj edhe ne pikënisje do ta kishim një figurë konsensuale. Pra, dikush që s’është i asnjë partie politike, dikush që është përtej polemikave të skenës aktuale”.
Por, Hamza paraprakisht shprehi një qëndrim ndryshe nga ky i Kurtit.
Gjatë deklarimit për gazetarët, Hamza tha se përgjegjësia për formimin e institucioneve i takon LVV-së, duke theksuar se të gjitha partitë e tjera nuk mund ta zgjedhin kreun e ri të shtetit pa partinë e Kurtit.
“LVV-ja duhet të gjejë partnerë, sipas nevojave dhe kritereve të saj dhe interesave të tyre për t’i dhënë vendit institucione”.
Qëndrimin për Presidentin Kurti u duk se nuk e ka ndryshuar. Ai tha se Kushtetuta e kërkon një figurë që “s’është i asnjë partie politike, dikush që është përtej polemikave të skenës aktuale”.
Para zgjedhjeve, Kurti e kishte propozuar Feride Rushitin si një figurë e tillë konsensuale.
Një mosndryshim qëndrimi nga ai që mbante LDK para zgjedhjeve të qershorit paralajmëroi dje edhe Abdixhiku kur u pyet nga gazetarët se me çfarë pozicioni do të hynte në takim me Kurtin.
“Parimet e LDK’së tashmë janë publike. Do të flasim për një trajtim gjithëpërfshirës të të gjitha institucioneve. Brenda kësaj të ketë balancë mes palëve që i ndërtojnë institucionet…Ne do të ulemi me parimet tona, në këtë fazë s’do të flasim për emra, do të dëgjojmë edhe palën tjetër. Po shkojmë me vullnet të mirë dhe do të qëndrojmë me vullnet të mirë”.
Para takimit me Abdixhikun, Kurti u kujdes të çojë mesazh se për ta votuar Presidentin duhen siguruar 84-85 vota.
“Ju e dini që edhe nuk është aspak i sigurt nëse e konsiderojmë që numri 80 apo 81 i deputetëve garanton kuorumin e nevojshëm. Andaj siç e kemi thënë më herët që është e nevojshme që t’i kemi 84 apo 85 që të jemi të sigurt për rrugën përpara njësoj vlen edhe këtë tani”, është shprehur ai.
Me këtë, Kurti ka lënë të kuptohet se një marrëveshje politike për të cilën po flet LDK (VV- LDK-pakicat) s’do ta arrinte numrin e votave të kërkuara nga ai.
Ndryshe nga Hamza e Abdixhiku, kryetari i AAK’së ia ktheu letrën Kurtin, duke i thënë se nuk e sheh të nevojshëm takimin me të meqë një ofertë, që ia kishin bërë Vetëvendosjes më 26 qershor, vlen ende.
“Aleanca është e gatshme pa kushte ose kërkesa vetjake të ndihmojë në bërjen e kuorumit për zgjedhjen e Presidentit/es, nëse mandatari për krijimin e Qeverisë i pranon gjashtë pikat e ofertës sonë. Kjo ofertë ka për qëllim që ta shtyjmë përpara zhvillimin ekonomik të Kosovës, forcimin e pozitës ndërkombëtare të vendit dhe, njëkohësisht, të mos e dërgojë vendin edhe njëherë në zgjedhje”, thuhej në letrën e Gjinit dërguar Kurtit.
AAK ka radhitur gjashtë kërkesa në këmbim të votave për Presidentin, të cilat kryesisht lidhen me pranimin e gazit amerikan, pavarësi energjetike, ndihmë për bujqit e të tjera.
