Daut Haradinaj, deputet i Aleancës për Ardhmërinë e Kosovës, ka reaguar ashpër ndaj asaj që e quajti “fushatë e paskrupullt” nga Vetëvendosje për instrumentalizim të Forcës së Sigurisë së Kosovës “për të bërë apolitik mbi viktima të tragjedisë”.
Kjo referuar portretizimit sovranistik të ekipeve të kërkim-shpëtimit për gjetjen e trupit e një personi të mbytur në liqenin e Ujmanit.
“Duke i shprehur ngushëllimet më të sinqerta familjes së të riut që u gjet sot në liqenin e Ujmanit, shpreh po ashtu indinjatën e thellë për kampanjën e paskrupullt që u bë duke instrumentalizuar FSK-në, e cila falë përgatitjeve intensive ndër vite me ndihmën e KFOR-it, ka arritur që të jetë në krye të detyrës në çdo skaj të Kosovës. Të bëhet politikë mbi viktima të tragjedive si kjo, tregon edhe një herë fytyrën e vërtetë të këtyre njerëzve”, tha Haradinaj.
