Kryetari i AAK’së, Ramush Haradinaj, ka shkruar sot në Lybeniq për të përkujtuar masakrën që kishte ndodhur atje në vitin 1999.
Ai tha se sa herë që shkon në Lybeniq, një pjesë e zemrës mbet me familjarët që ende presin që të dashurit e tyre ta kenë një varr për t’iu vendosur lule.
“Sa herë vijmë në Lybeniq, një pjesë e zemrës mbetet këtu, me familjarët që ende presin që të dashurit e tyre të kenë një varr për t’iu vendosur lule.”
Haradinaj ka thënë se Lybeniqi u sulmua edhe më 25 maj të vitit 1998, por java e parë e prillit 1999 ishte e kobshme. Ai shtoi se armiku ekzekutoi mbi 100 shqiptarë në Lybeniq, Buçan, Rashiq, Loxhë, Kosuriq e Prilep.
“Lybeniqi u masakrua edhe më 25 maj 1998, e java e parë e prillit 1999 ishte e kobshme për këtë fshat e zonën përreth, që u bënë cak të represionit të tmerrshëm e të paparë. Armiku ekzekutoi mbi njëqind shqiptarë të paarmatosur, nga fshatrat Lybeniq, Buçan, Rashiq, Loxhë, Kosuriq e Prilep.”
Ai ka pyetur se “a vritet njeriu, vetëm se e ëndërron lirinë e Atdheut të tij?”
“Këtë e bëri pa mëshirë barbaria e shtetit fashist serb, që nuk kurseu askënd që i doli para, gra, fëmijë e pleq. Asnjëherë nuk do t’i harrojmë njerëzit tanë, që me jetët e tyre i’u bënë mburojë kësaj toke. Sot e për mot, përulemi me respekt para sakrificës së të rënëve për liri!
