Nënkryetari i Lidhjes Demokratike të Kosovës, Lutfi Haziri, ka reaguar pas zgjedhjeve të 28 dhjetorit, duke theksuar se viti 2025 do të mbahet mend si vit zgjedhor, me tri procese zgjedhore dhe katër herë dalje në votime. Ai ka deklaruar se, ndonëse pritjet ishin më të mëdha, LDK nuk arriti t’i kapitalizojë zgjedhjet në mënyrën më të mirë, duke përmendur si faktorë popullizmin, presionin dhe frikën e mbjellë gjatë fushatës.
Haziri ka theksuar se LDK ka dalluar gjithmonë nga partitë e tjera për qasjen e saj, duke promovuar paqen, bashkëpunimin dhe normalitetin politik, edhe në rrethana të vështira.
Ai ka bërë thirrje për reflektim të thellë brenda partisë, duke vlerësuar se pragmatizmi, i cili sipas tij ka qenë sinonim i LDK-së, është zbehur, shqetësim që thotë se e ka shprehur edhe më herët publikisht.
Pavarësisht rezultatit të pafavorshëm në zgjedhjet e 28 dhjetorit, Haziri ka falënderuar qytetarët për besimin e dhënë ndaj LDK-së, duke e cilësuar partinë si shtëpi të përbashkët që ka dhënë dije, përkushtim dhe shpresë për Republikën. Ai ka kujtuar trashëgiminë politike të Ibrahim Rugovës, duke theksuar se LDK mbetet e përkushtuar ndaj vlerave të tolerancës dhe respektit, ndërsa ka uruar që viti 2026 të jetë më i mirë për të gjithë qytetarët.
Reagimi i plotë:
Të dashur bashkëvendas, qytetarë të Republikës e bashkatdhetarë,
2025-ta do të mbahet mend si vit i zgjedhjeve, pasi kaluam tre procese zgjedhore dhe katër herë votuam.
Ndonëse pritjet ishin tjera, LDK nuk arriti t’i kapitalizojë në mënyrën më të mirë zgjedhjet e 28 dhjetorit, përballë popullizmit të paparë ndonjëherë, presionit e frikës së mbjellur.
LDK ka dalluar gjithmonë prej të tjerëve. Edhe kur armiqtë thërrisnin për luftë, ne ftuam për paqe; kur rivalët ju ftonin në garën e pështymës, ne ftuam për bashkëpunim; kur të tjerët ju braktisën, ne qëndruam me ju, sepse masat qytetare duhet të udhëhiqen drejt normalitetit, e jo në errësirën politike.
Sot është koha e fundit për reflektim të thellë. Pragmatizmi, që ishte sinonim i LDK-së, humbi. Ky ishte edhe shqetësimi im, të cilin e kam shpërfaqur publikisht disa herë. Mos kërko vullnet të mirë aty ku nuk ka e nuk gjen!
Unë e njoh mirë LDK-në sepse për 36 vite më ka dhënë idealet për kombin, besim në Republikën, dashni e përkushtim.
Edhe në ditët më të mira e edhe në ditët më të rënda, unë i qëndrova besnik partisë që Republikës i dha formë, besim e shpresë.
I tillë do të vazhdoj të jem gjithmonë, sepse jam rritur afër njerëzve që përmes librave na mësuan se si duhet atdheu.
LDK mbetet gjithmonë shtëpi e përbashkët, mbetet parti që jep dije, përkushtim e dashni, sepse atdheu ynë është mbi të gjithë dhe mbi gjithçka.
Mbi të gjitha, Ibrahim Rugova, prijësi ynë i urtë e i butë, na ka mësuar që ta duam dhe ta ruajmë njëri-tjetrin edhe në dallime. Na e ka dhënë mësimin e madh që të mos marrim pjesë në garën e pështymës dhe rivalët politikë të mos i konsiderojmë kurrë armiq.
Ndonëse LDK doli me këtë rezultat të pafavorshëm, unë gjej rastin që t’ju falënderoj nga fundi i zemrës të gjithëve për kaq besim sa na keni dhënë.
Ndërkaq, në prag të ndërrimit të motmoteve, uroj nga zemra që 2026-ta të jetë vit më i mirë për të gjithë, që të keni harmoni e dashni në familjet tuaja.
P.S. Unë e familja ime do ta mbajmë në zemër humbjen më të madhe që pësuam, pas ndarjes nga jeta të vëllait tonë Bedrës. Nëna ime humbi djalin e dashur, Arti e Olti babain, por kujtimet e buzëqeshja e tij do të na mbajnë përgjithmonë.
