Nënkryetari i Lidhjes Demokratike të Kosovës, Lutfi Haziri, ka konfirmuar se partia mban të njëjtat qëndrime rreth koalicionit të mundshëm me Vetëvendosjen, edhe pas ftesës për takim që kryeministri në detyrë, Albin Kurti, i bëri kryetarit të LDK-së, Lumir Abdixhiku.
Haziri theksoi në emisionin “DPT te Fidani” se qëndrimi i LDK-së ishte bërë i ditur që para dy javësh dhe mbetet i pandryshuar.
“Ne kemi thënë jo. Ne e kemi thënë para dy javësh. Qëndrimi i LDK-së nuk ka ndryshuar.” – tha ai.
Ai kritikoi gjuhën dhe veprimet e zyrtarëve të Lëvizjes Vetëvendosje dhe kryeministri Kurtit duke i akuzuar për “polarizim” të popullatës.
“Vetëvendosja është sjellë, edhe me fjalor edhe me veprime politike deri sot, si fitues i madh që nuk ka nevojë për askënd, ka fragmentuar, ka ndarë dhe polarizuar popullatën në Kosovë.” – tha Haziri.
