Sot, gjatë një përpjekjeje për të marrë një përgjigje lidhur me një premtim të pambajtur për furnizimin me ujë dhe rregullimin e kanalizimeve në 48 fshatra të Prishtinës, gazetarja e Gazetës Online Reporteri.net, Leonora Kolukaj, është penguar me forcë nga një grua nga stafi i kryetarit të Komunës së Prishtinës, Përparim Rama.
Kolukaj, e cila nuk kishte marrë përgjigje nga zyra e Komunës për çështjen që po trajtonte, kishte insistuar të ballafaqonte kryetarin gjatë një konference për media.
Gjatë këtij momenti, përveç ndërhyrjes fizike të stafit, vetë kryetari Rama përdori gjuhë me ngjyrim seksist ndaj gazetares, kur ajo u përpoq të tregonte mirëkuptim duke vendosur ta priste pas përfundimit të konferencës
“Jo me ikë kryetar, sepse po të kërkoj që një javë”, tha gazetarja.
“Jo loçka jem”, iu përgjigj Rama.
Pas kësaj, kryetari Rama u largua nga vendi i ngjarjes pa dhënë përgjigje dhe pa u ndalur për t’u ballafaquar me premtimin në fjalë.
