Irani ka reaguar ndaj deklaratave të presidentit francez Emmanuel Macron lidhur me çminimin e Ngushticës së Hormuzit, duke theksuar se çdo operacion i tillë do të kryhet ekskluzivisht nga Teherani.
Zëvendësministri i Jashtëm iranian, Kazem Gharibabadi, deklaroi në platformën X se çminimi i ngushticës do të zhvillohet në përputhje me Memorandumin e Mirëkuptimit (MoU) mes Iranit dhe Shteteve të Bashkuara.
Ai kritikoi komentet e Macron, sipas të cilave Franca dhe Omani do të bashkëpunojnë me partnerët e tyre për të hequr minat dhe për të garantuar lirinë e lundrimit në këtë korridor strategjik.
Gharibabadi e cilësoi situatën në Lindjen e Mesme si të ndjeshme dhe të ndërlikuar, duke i bërë thirrje Francës të mos e përshkallëzojë më tej tensionin me deklarata që, sipas tij, janë provokuese.
Më herët, Macron njoftoi se gjatë takimit me Sulltanin e Omanit, Haitham bin Tariq, në Pallatin Elysee, ishte rënë dakord për të punuar së bashku me partnerët ndërkombëtarë për çminimin e Ngushticës së Hormuzit, me synimin për të garantuar sigurinë e korridoreve detare dhe kalimin e lirë të anijeve në një nga rrugët më të rëndësishme të transportit të naftës në botë.
