Komanda ushtarake e Iranit deklaroi se po e mbyll Ngushticën e Hormuzit për shkak të shkeljeve “të vazhdueshme” të armëpushimit në Liban nga Izraeli dhe për shkak se Shtetet e Bashkuara “nuk kanë zbatuar” pikën e parë të marrëveshjes së përkohshme për përfundimin e luftës, raportuan të shtunën mediat shtetërore iraniane, transmeton BBC.
“Duke pasur parasysh mungesën e vullnetit të mirë nga ana e Shteteve të Bashkuara dhe shkeljen e qartë të angazhimeve të tyre përmes moszbatimit të nenit të parë të memorandumit për përfundimin e luftës, si dhe në përgjigje të shkeljes së vazhdueshme dhe të pandërprerë të armëpushimit nga regjimi sionist në jug të Libanit… Kjo shpall se Ngushtica e Hormuzit do të mbyllet për kalimin e anijeve,” thuhet në një deklaratë të Komandës Qendrore Khatam al-Anbiya, organi më i lartë i komandës së përbashkët ushtarake të Iranit, e cila u raportua nga transmetuesi shtetëror IRIB, përcjellë në shqip gazeta online Reporteri.net.
Para luftës, rreth një e pesta e furnizimit global me naftë transportohej përmes kësaj rruge ujore strategjike. Por pas sulmeve amerikano-izraelite ndaj Iranit në shkurt, Teherani e mbylli në mënyrë efektive ngushticën dhe çmimet globale të naftës u rritën ndjeshëm.
Çmimet filluan të bien më herët gjatë kësaj jave, pasi SHBA-ja dhe Irani nënshkruan një memorandum mirëkuptimi (MOU) për t’i dhënë fund armiqësive dhe për të rihapur ngushticën. Megjithatë, përpjekjet për të çuar përpara marrëveshjen janë penguar nga fushata e vazhdueshme e Izraelit në Liban.
Memorandumi prej 14 pikash parashikon “ndërprerjen e menjëhershme dhe të përhershme të operacioneve ushtarake në të gjitha frontet, përfshirë Libanin”, sipas një përmbledhjeje të publikuar nga një zyrtar i lartë i administratës amerikane.
