Valton Peci, zyrtar i stafit politik i zv. Ministrit të Mbrojtjes, Shemsi Syla, njëherit ish-drejtori i Emergjencave në Leposaviq dhe aktivisti i kahershëm i Lëvizjes Vetëvendosje në Mitrovicë, ka mbetur jashtë listës së Lëvizjes Vetëvendosje për deputetë, njofton Mitropol.
Ai nuk arriti të bëhet i dëshiruar për liderin e partisë, Albin Kurtin, sa për ta futur në listën për deputetë, përkundër entuziazmit të madh që pati ditëve të fundit me shpresën se do i futej garës, pasi mori “aminin” e degës në Mitrovicë.
Peci nuk është krejt i panjohur për publikun. Ai është protagonist i njërës prej videove të skandaleve brenda Komunës së Leposaviqit të publikuara nga Gazeta Nacionale gjatë vitit të kaluar. Aty ai shihet teksa i tregon punëtorëve shqiptarë e serbë se Hetemi atë ditë kishte njoftuar se s’kanë mbledhje, andaj mund të largoheshin nga puna edhe pa e përfunduar orarin zyrtar e zyrtarët shihen teksa po pinin raki.
Në videot e tjera nga Komuna, shiheshin sjellje të çuditshme të punëtorëve të komunës së Leposaviqit, e cila udhëhiqej nga kryetari Lulzim Hetemi. Punonjësit kapeshin me njëri-tjetrin, bënin lëvizje të çuditshme, e krejt kjo nëpër zyrat e komunës. Ata zgjedhnin mënyra të tjera për të kaluar kohën e lirë, dikush madje luante edhe Counter Strike.
Valton Peci në zgjedhjet lokale të vitit 2021 ishte kandidat i Lëvizjes Vetëvendosje për anëtar të Kuvendit Komunal të Mitrovicës, por për shkak të numrit të pamjaftueshëm të votave nuk kishte arritur të zgjedhet, por megjithatë, ky rezultat dëshpërues nuk ia trembi syrin Pecit që të kërkonte nga Kurti t’i futej garës për deputet.
Por, duket se rezultati i vitit 2021 kishte rëndësi për Kurtin dhe udhëheqësinë e VV-së, andaj e lanë Pecin jashtë listës që u publikua mbrëmë pas mesnate./Mitropol/
