Ish-drejtori i marketingut dhe ish-drejtori financiar i Telekomit të Kosovës, akuzohen për përvetësim në detyrë dhe falsifikim të dokumenteve.
Prokuroria Speciale ka ngritur sot aktakuzë ndaj Trim Musliut dhe Armend Osajt.
Musliu, në cilësinë e ish-drejtorit të marketingut dhe Osaj në cilësinë e ish-drejtorit financiar dyshohen për vjedhjen e 255 telefonave mobilë nga ndërmarrja publike në të cilën ishin të punësuar.
“Për të pandehurin T.M. ekziston dyshimi i bazuar se ka kryer veprat penale Përvetësimi në Detyrë nga neni 425 paragrafi 1 lidhur me paragrafin 3 të KPRK-së, nr.04/L-082 dhe Falsifikim i Dokumenteve nga neni 390 paragrafi 1 lidhur me paragrafin 2 të KPRK-së”.
“Për të pandehurin A.O. ekziston dyshimi i bazuar se ka kryer veprat penale Përvetësimi në Detyrë nga neni 418 paragrafi 1 lidhur me paragrafi 3 të KPRK-së, nr.06/L-074 dhe Falsifikim i Dokumenteve nga neni 390 paragrafi 1 lidhur me paragrafin 2 të KPRK-së”, tha sot Prokuroria Speciale.
Përpos tyre, Prokuroria Speciale ngriti aktakuzë edhe ndaj pesë personave të tjerë për vepra që ndërlidhen me korrupsionin në Telekomin e Kosovës.
I pandehuri tjetër është Denis Çeman, i cili akuzohet për falsifikim të dokumenteve, raporton Paparaci.
“Për të pandehurin D.C. ekziston dyshimi i bazuar se ka kryer veprën penale Falsifikim i Dokumenteve nga neni 390 paragrafi 1 lidhur me paragrafin 3 dhe lidhur me nenin 31 të KPRK-së”, tha Prokuroria Speciale në njoftim për media.
Dy të tjerë A.L. dhe F.A. akuzohen për keqpërdorim dhe mashtrim në prokurim publik, si dhe për shamangie të tatimit.
Ndërkaq, për të pandehurin G.H. ekziston dyshimi i bazuar se ka kryer veprën penale dokumente të rrejshme lidhur me tatimin.
